(रोशन निधि)
रौतहट । जिल्ला प्रहरीकार्यालयले विभिन्न प्रलोभन वा आश्वसन दिएर रकम ठगी र असुली कार्यमा संग्लन ८ जनालाई पक्राउ गरेको छ । जिल्ला प्रहरी कार्यालय रौतहटको टोलीले माधवनारायणबाट ६ जना तेसैगरि गौर बाट २जनालाई नियन्त्रणमा लिएको छ।
विपन्नलाई नयाँ घर बनाइदिने प्रलोभन देखाएर गाँउमा रकम ठगी गरेको आरोपमा ६ जनालाई पक्राउ गरेर प्रहरीले थप अनुसन्धान अगाडि बढाएको छ । माधवनारायण नगरपालिका वडा नाे.७ लौकाहा गाउँ बस्ने बर्ष ५२ को रामनाथ माझी, ३२ बर्षीय प्रकाश माझी, गरुडा नगरपालिका ९ गेडहीगुठीका २५ बर्षीय सिकिन्द्र ठाकुर लोहार, वडा नम्वर ५ शिवनगरकाे ७१ बर्षीय मुगलाल महरा, वडा नम्वर ९ का ४५ बर्षीया रामकली देवीलाई पक्राउ गरेको छ।
गरिव असहाय विपन्न समुदायकाे मानिसहरुलाई विभिन्न प्रलोभन देखाई रकम ठगी गर्ने गरेको उजुरीकाे आधारमा पक्राउ गरिएको जिल्ला प्रहरी कार्यालयले जनाएको छ ।
जिल्ला प्रहरी कार्यालय रौतहटकाे प्रहरी नायव उपरिक्षक एवम् प्रवक्ता एलिजा गिरीका अनुसार माधवनारायण नगरपालिका–८, रजवडा टोलका स्थानीय विपन्न वर्गका मानिसहरूलाई आवास बनाइदिछु भन्दै रकम ठगी गरेको पाइएपछि नियन्त्रणमा लिएको हो । मधेश प्रदेशको सहरी विकास मन्त्रालयबाट गरिब र विपन्न वर्गका घर परिवारलाई आवास बनाइदिने कार्यादेश प्राप्त भएको भनी विभिन्न प्रलोभन देखाई प्रतिघर दश हजारदेखि चालीस हजार रुपैयाँसम्म रकम उठाएको छ भन्ने आरोपमा पक्राउ गरेको प्रहरीले जानकारी गराएको छ ।
तेसैगरि जिल्ला प्रहरी कार्यालय रौतहटका अनुसार सवारी चालक अनुमति पत्र बनाई दिने भन्दै रकम असुल्ने गरेको आरोपमा दुई जनालाई नियन्त्रणमा लिएको छ।
यातायात व्यवस्था कार्यालय गौरबाट सेवाग्राहिलाई सवारी लाईसेन्स बनाई दिने भन्दै रकम मागेको आरोपमा चितवन भरतपुर-१० बस्ने ४५ वर्षीय रमेश पाठक र गौर नगरपालिका–१ बस्ने ४८ वर्षीय श्याम नारायण साहलाई प्रहरीले पक्राउ गरेको हो ।
राजदेवी नगरपालिका वडा नं. २ स्थित रहेको ट्रायल सेन्टरमा पुगेर परीक्षामा उर्तिण गराई लाइसेन्स बनाइदिने आश्वासन दिने गरेको पाइएको प्रहरीले जारी गरेको प्रेस नोटमा भनिएको छ । उनीहरुले १० हजारदेखि ३० हजार सम्म असुल्ने गरेको आरोप रहेको प्रहरीले जनाएको छ ।
२०७९ साल फागुन १८ गते यातायात व्यवस्था कार्यालय गौरमा स्थापना भएको हो । कार्यालयबाट स्कुटर, जीप, कार, टेम्पु, ट्याक्टर लगायतका सवारी साधनको सवारी चालक अनुमति पत्र वितरण तथा सवारी साधनको नविकरण, सवारी दर्ता, सवारी जाँचपास र नामसारी लगायतका कार्य हुदै आएको छ ।
कार्यालयले नियामनुसार नै लिखित तथा प्रयोगात्मक परीक्षा संचालन गर्दै आएकाले बिचौलियाहरुसँग सम्पर्क नगर्न र प्रलोभनमा नपर्न अनुरोध गरेको छ ।
