(ABC-Sanchar)
दाङ । शुक्रवारको लुम्बिनी प्रदेश सभाको बजेट माथिको छलफल स्थगित भएको छ ।
कांग्रेस संसदीय दलका नेता एवं पूर्व मुख्यमन्त्री डिल्लीबहादुर चौधरीले विशेष समय लिएर बैठकमा बोल्दै बजेट संघीयता विरोधी भएको, कृषि र पर्यटन क्षेत्र विरोधी भएकाले कांग्रेसले त्यसको बिरोध गर्दै बैठक अवरोध गर्ने बताएका थिए । त्यस लगत्तै विपक्ष दलका प्रदेश सभा सदस्यहरुले उठेर विरोध जनाएका थिए ।
नेता चौधरीले कृषि र पर्यटनलाई प्राथमिकतामा राखेको सरकारले कृषिमा चालु वर्षको भन्दा ५८ करोड बजेट घटाएको, पर्यटनमा पनि बजेट घटाएको भन्दै बिरोध गरेका थिए । किसानलाई समयमै मलबिउ पुर्याउन नसक्ने सरकार किसान मैत्री हुनै नसक्ने उनको तर्क थियो ।
उनले सरकारले प्रदेशको लोपोन्मुख समुदाय बादी, गन्धर्व, चमार, नटुवा जातीका लागि राखिएको बजेट पनि कटौती गरेको बताए । बाटो बनाएर मात्र संघीयता कार्यान्वयन नहुने भन्दै कांग्रेस बजेटको विपक्षमा उभिने बताए । ‘सरसर्ती हेर्दा बजेट सैद्धान्तिक रुपले संघीयता विरोधी छ, कृषि र पर्यटन विरोधी छ,’ उनले भने, ‘बाटो बनाएर संघीयता लागु हुँदैन, किसानलाई मल बिउ दिने र स्थानीय उत्पादनको ब्राण्डिङ गर्ने बजेट लुम्बिनीका लागि जरुरी हो ।’
