दाङ । घोराही सभ्यता पाठशालाका विद्यार्थीहरूलाई फुटबल सिकाएर राष्ट्रिय तथा अन्तर्राष्ट्रियस्तरका फुटबल खेलाडी बनाउनका लागि विदेशी कोचलाई नियुक्त गरिएको हो । जसका लागि मध्य अफ्रिकाका बार्गा विलफ्रेडलाई फुटबल कोचरको रुपमा नियुक्त गरिएको सभ्यता पाठशालाले जनाएको छ । आफ्ना विद्यार्थीहरूलाई फुटबल खेलमा उत्कृष्ट बनाएर राष्ट्रिय तथा अन्तर्राष्ट्रिय खेलाडी उत्पादन गर्ने उद्देश्यका साथ बार्गालाई कोचको रुपमा नियुक्त गरेको हो ।
आज एक कार्यक्रमको आयोजना गरी पाठशालाले बार्गा विलफ्रेडसँग सम्झौता गरी नियुक्तिपत्र समेत हस्तान्तरण गरेको विद्यालयका प्रिन्सिपल चेतमान घर्ती मगरले जानकारी दिए । फुटबल कोचरको रूपमा नियुक्त भएसँगै बार्गाले आगामी छ महिनासम्म सभ्यता पाठशालाका विद्यार्थीहरूलाई फुटबल सिकाउनेछन् ।
