दाङ । संसारमा पत्रकारिताको सुरूवात प्राचीन समयदेखि नै भएको मानिन्छ। यद्यपि आधुनिक पत्रकारिताको सुरुवात १६ औं शताब्दीमा भएको मानिन्छ।
प्राचिन समयमा पत्रकारिता माैखिक थियाे । जस्ताेकी हाम्राे पूर्वीय सभ्यतामा नारदमुनी घरघरमा पुगेर एक अर्काकाे खबर आदानप्रदान गर्दथे ।
आधुनिक पत्रकारिता छापा माध्यमबाट शुरू भएकाे थियाे । तर, अहिले पत्रकारितामा आमूल परिवर्तन आएको छ। सूचना प्रविधिको तीव्र विकासले आम नागरिकलाई पत्रकार बनाइदिएको छ।
पत्रकारिताकै भाषामा भन्ने हो भने यसलाई “नागरिक पत्रकारिता” भन्न सकिन्छ । अब कुनै ठाउँको खबर, घटना या अवस्थालाई आम जनताका कहाँ पुर्याउनका लागि व्यावसायिक पत्रकारिताको जरुरत पर्दैन ।
अब आम सर्वसाधारणले नै सामाजिक सञ्जालहरूमार्फत एक ठाउँबाट अर्को ठाउँमा या एकैपटक आम जनमानसमा सन्देश प्रवाह गर्न सक्छन् । नागरिक पत्रकारिता प्रारम्भिक चरणमा भएकाले सुरुसुरुमा सन्देश प्रवाहमा आग्रह पूर्वाग्रह देखिएको हुनसक्छ । तर, क्रमश: यो सुधार हुँदै जानेछ।
नागरिक पत्रकारिता लोकतन्त्रको उच्चविन्दु हो । तर, अब व्यावसायिक पत्रकारहरूको औचित्य सकियो भन्ने कुरा चाहिँ साँचो होइन । किनकि गहन खोजमूलक समाचार लेख्नका लागि व्यावसायिक पत्रकारहरु नै जरुरत पर्छ ।
बरु व्यावसायिक भनिने पत्रकारहरूले आफ्नो क्षमता, दक्षता र खोजपत्रकारिताको क्षेत्रमा नयाँ सम्भावनाहरूको खोजी गर्नुपर्छ । नत्र नागरिक पत्रकारिताले हाम्रो परम्परागत पत्रकारितालाई कुप्लुक्क खाइदिनेछ।
