दाङ । भालुवाङ लुम्बिनी प्रदेश सरकारले सामुदायिक वनमाथि जबर्जस्ती लगाएको कर तत्काल खारेज गर्न वन महासंघका केन्द्रीय अध्यक्ष ठाकुर भण्डारीले प्रदेश सरकारशीत जोडदार रूपमा आवाज बुलन्द गरेका छन् । वन महासंघ लुम्बिनी प्रदेशकाे बिहीबार बिहानदेखि अपरान्हसम्म प्रदेश राजधानीस्थल राप्ती उपत्यका देउखुरीकाे भालुवाङ, सातमाराको होटल इभरल्याण्डकाे सभाहलमा सम्पन्न १०औं बैठकलाई सम्बाेधन गर्ने क्रममा अध्यक्ष भण्डारीले उक्त कुरा बताएका हुन् ।
सामुदायिक वन महासंघका केन्द्रीय अध्यक्ष भण्डारीले सामुदायिक वनहरुबाट प्राप्त आम्दानी प्रदेश र स्थानीय सरकार जस्तै सामुदायिक विकासमा लगानी गर्दै आइरहेकाे र लुम्बिनी प्रदेश सरकारलाई कर खारेज गरेर करमुक्त प्रदेश बनाउन विशेष अनुरोध गरेका छन् ।
लुम्बिनी प्रदेश सरकारले कर खारेज नगरे प्रदेश सरकारका विरुद्धमा आफूहरूले कडाइसाथ आन्दाेलन गर्ने चेतावनी समेत दिएका छन् । केन्द्रीय अध्यक्ष भण्डारीले सामुदायिक वन आफैंमा विशुद्ध नागरिकहरुको सरोकार राख्ने संस्था भएकाे हुँदा प्रदेश भरिका सामुदायिक वनलाई साथमा लिएर सरकारका बिरूद्ध आन्दाेलन गर्ने घोषणा गरे ।
सामुदायिक वन महासंघ, लुम्बिनी प्रदेश अध्यक्ष कल्पना भण्डारीले अध्यक्षता गरेको बैठकले प्रदेश सरकारलाई कर खारेजीका लागि अनुरोध गर्ने र कर खारेज नगरे सशक्त आन्दाेलनमा उत्रिने निर्णय गरेकाे वन महासंघ लुम्बिनी प्रदेशका महासचिव शाेभाकर सापकाेटाको आक्रोश थियो । बैठकले २०८१ सालको माघ मसान्त सम्म प्रदेश भरिका सम्पूर्ण सामुदायिक वनलाई करकाे दायरामा ल्याउन प्यान नम्बर लिन लगाउने र अन्य संघ संस्थासंग समन्वय गर्दै प्रदेशकाे गतिबिधि अगाडि बढाउने निर्णय सर्वसम्मतले पारित गरेको पनि महासचिव सापकाेटाले बताएका छन् ।
सामुदायिक वन महासंघ, लुम्बिनी प्रदेश उपाध्यक्ष हुमनाथ भट्टराईले बैठकमा उपस्थित सबैलाई महासंघका तर्फबाट स्वागत गरेका थिए । स्वागत मन्तव्यबाट शुरू भएकाे बैठकमा महासंघकी सचिव मधुकला कँवरले बार्षिक प्रतिवेदन सार्वजनिक गरेकी थिइन् । महासंघको १०औं बैठकमा वन महासंघका केन्द्रीय उपाध्यक्ष माेहम्मद कर खाँ, केन्द्रीय सचिव डिल्ली गिरी, केन्द्रीय सदस्यहरू दिनानाथ आचार्य, कमल परियार, टिचन गुरूङ्ग, प्रदेश सदस्यहरू अमृता नेपाल, यमबहादुर थापा, बाबुराम पाैडेल, दाङ जिल्ला अध्यक्ष हरिप्रसाद भुसाल सहितले आआफ्नो धारणा राखेका थिए । त्यसैगरी सो बैठकमा नबलपरासी अध्यक्ष शारदा पाेख्रेल, रूपन्देही अध्यक्ष श्यामकला आचार्य, पूर्व रूकुम अध्यक्ष बिष्णु देबकाेटा, अर्घाखाँची अध्यक्ष मधुकुमार थापा, प्यूठान अध्यक्ष धुब्र थापा, बाँके उपाध्यक्ष रामबहादुर भण्डारी, बर्दिया अध्यक्ष गाेपाल चाैधरी र राेल्पा सचिव टिखा आचार्य लगायतकाे उपस्थिति रहेकाे थियाे । बैठककाे सहजीकरण वन महासंघ लुम्बिनी प्रदेशका महासचिव शाेभाकर सापकाेटाले गरेका थिए ।
