भैरहवा । रुपन्देहीको सीमावर्ती क्षेत्रबाट भन्सार छलेर लोड गरी पोखरातर्फ लैजान लागिएको २ सय १० बोरा चिनीसहित ट्रक भैरहवा भन्सार कार्यालयले बिहीबार बिहान नियन्त्रणमा लिएको छ ।
भैरहवा । लुम्बिनी सडक खण्डमा पर्ने बेथरी नजिकै सडकबाट लु २ ख २८३६ नम्बरको ट्रक र चालकसहित अवैध रुपले भारतबाट भित्र्याइएको उक्त चिनी भन्सार टोलीले नियन्त्रणमा लिएको हो । चिनी र ट्रकको मूल्य १६ लाख रुपैयाँ छ ।
भैरहवा भन्सार कार्यालयका प्रमुख नारद गौतमले ६ दिनको अन्तरालमै भन्सार गस्ती टोलीले भैरहवा–लुम्बिनी सडक खण्डबाट अवैध चिनीसहितको ट्रक नियन्त्रणमा लिएको बताए ।
गौतमका अनुसार पक्राउ परेका चालक रुपन्देहीको मायादेवी गाउँपालिका–२ निवासी ३५ वर्षीय शिवकुमार यादव हुन् । रुपन्देहीको झुलनीपुरबाट उक्त चिनी लोड गरी पोखरातर्फ लैजान लागेको कुरा प्रारम्भिक बयानका क्रममा चालकले बताएका छन् ।
चिनीको मूल्य ६ लाख र ट्रकको मुल्य १० लाख रुपैयाँ कायम गरिएको छ । चिनी बोरामा खन्याएर सिलाइएको छ । यसअघि भन्सार टोलीले गत शनिबार भैरहवा–लुम्बिनी सडक खण्डमा पर्ने रुपन्देहीको रमवापुरबाट भन्सार छलि गरिएका २ सय ४० बोरा चिनीसहित ग २ ख १२९० नम्बरको ट्रक नियन्त्रणमा लिएको थियो ।
