काठमाडौं । पहिले सेनामा प्रवेश गरेर तालिमरत अधिकृत क्याडेटले अब सहायक सेनानी बराबरकै तलब पाउने गरी वृद्धि गरेको २४ भदौदेखि अवकाशमा हुन लागेका प्रधान सेनापति प्रभुराम शर्माले आफ्नो अन्तिम सम्बोधनमा बताएका छन् ।
आफ्नो तीन वर्षे कार्यकालबारे संक्षिप्त सम्बोधन गर्ने क्रममा उनले सैनिक सेवामा आबद्ध भएपश्चात् पनि व्यक्तिगत खर्चका लागि अभिभावकहरूसँग भर पर्नुपर्ने स्थिति अन्त्य गर्न तलब वृद्धि गरेको बताएका छन् ।
नेपाली सेनाकाअनुसार, पहिले अधिकृत क्याडेटले भत्ता मात्र पाउने गरेका थिए । सहायक सेनानीले कम्तीमा ४३ हजार रुपैयाँ तलब पाउँछन् ।
सैनिक स्रोतका अनुसार, अधिकृत क्याडेटलाई पनि सहायक सेनानी बराबरको तलब सुविधा दिन पहिल्यैदेखि पहल भइरहेपनि अर्थ मन्त्रालयबाट सहमति नआउँदा ढिलाइ भएको थियो ।
नेपाली सेनामा साधारण सेवा अन्तर्गत अधिकृत क्याडेट, पदिक तथा बिल्लादार अधिकृत क्याडेट, सैन्य र फलोअर्समा भर्ना हुन सकिन्छ । प्रधान सेनापति शर्माका अनुसार, उनको कार्यकालमा साधारण सेवामा बढुवाद्वारा सहायक सेनानी दर्जामा पदपूर्ति गर्न समेत कार्यविधि लागू गरिएको छ ।
