,
दाङ । चिकित्सा शिक्षा आयोगले राप्ती स्वास्थ्य विज्ञान प्रतिष्ठान घोराहीमा एमबीबीएस अध्यापनका लागि ५० सिट निर्धारण गरेको छ । आयोगले शुक्रबार ५० सिटको अनुमति सुनिश्चित गरेको प्रतिष्ठानका रजिस्ट्रार प्राध्यापक श्याम लम्सालले बताए ।
`राप्ती स्वास्थ्य विज्ञान प्रतिष्ठानको जिवनमा आज महत्वपूर्ण दिन : चिकित्सा शिक्षा आयोगबाट MBBS (50 seats) कार्यक्रम सन्चालन गर्न अनुमति प्राप्त भयो उनले भने – समग्र लुम्बिनी प्रदेशवासी र प्रतिष्ठानका शिक्षक कर्मचारीलाई हार्दिक बधाई !-
यो लुम्बिनी प्रदेशकै महत्त्वपूर्ण उपलब्धी भएको लम्सालले बताए । प्रतिष्ठान स्थापनाको ७ वर्षपछि एमबीबीएस पठनपाठनका लागि आयोगबाट अनुमति प्राप्त भएको उनले जानकारी दिए ।
सिट निर्धारणपछि एमाले महासचिब शंकर पोख्रेलले भने- `राप्ति स्वास्थ्य विज्ञान प्रतिष्ठान दाङले एमबीबीएस कक्षा संचालनका लागि अनुमति प्राप्त गरेको छ । यस वर्ष ५० जना विद्यार्थी भर्नाको कोटा प्राप्त गरेको छ । बधाई छ राप्ति स्वास्थ्य विज्ञान प्रतिष्ठान र यस अभियानमा संलग्न सबैलाई ।`
हाल प्रतिष्ठानमा बिएस्सी नर्सिङ, बिएनएस र एमडीएमएसका कक्षाहरू सञ्चालन भइरहेको प्रतिष्ठानका उपकुलपति डा. विकास लामिछानेले बताए ।
प्रतिष्ठानमा हाल ४० विशेषज्ञ, १७५ नर्स र ५० जना प्यारामेडिक्स कार्यरत छन् । अहिले प्रतिष्ठानमा दैनिक सरदर ८ सय बिरामीले सेवा लिइरहेको प्रतिष्ठानका उपकुलपति डा. लामिछानेले बताए । अहिले प्रतिष्ठानमा ३ सय बेडको क्षमता छ । सरकारको ‘एक प्रदेश, एक स्वास्थ्य विज्ञान प्रतिष्ठान’ भन्ने नीतिअनुसार स्थापित यो लुम्बिनीको एक मात्र प्रतिष्ठान हो । प्रतिष्ठानमा अध्ययन अनुसन्धानलाई अघि बढाउन आफ्नै बैज्ञानिक जर्नल प्रकाशन आरम्भ गरिसकेको छ ।
राप्ती स्वास्थ्य विज्ञान प्रतिष्ठान ऐन २०७४ अनुसार प्रतिष्ठान स्थापना भएको हो । २०१६ सालमा महेन्द्र हेल्थ सेन्टरका रुपमा स्थापित भएको स्वास्थ्य संस्था अहिले प्रतिष्ठानमा परिणत भएको हो । २०२१ सालमा १५ शय्याको महेन्द्र अस्पताल, २०५० सालमा २५ शय्याको अस्पताल र २०६४ मा ५० शय्याको अस्पतालमा स्तरोन्नती भएको थियो । २०६५ साल चैत १२ गते राप्ती उपक्षेत्रीय अस्पतालमा स्तरोन्नती भएको थियो । २०७१ सालमा १ सय शय्याको अस्पताल हुँदै २०७४ सालमा प्रतिष्ठानमा रुपान्तरण भएको हो । यसैगरेर पुर्बमन्त्री रेखा शर्माले पनि प्रतिष्ठानमा शैक्षिक कार्यक्रम अघि बढेकोमा धन्यवाद दिदै प्रतिष्ठानको बिकासमा एमबिबिएसको पढाई पनि कोसेढुङ्गासाबित हुने बताईन ।
