दाङ । भालुवाङ लुम्बिनी प्रदेशको राजधानी भालुवाङमा एउटा अर्को नयाँ दलको घोषणा गरिएको छ । अहिलेसम्म सत्तामा आसिन दलहरूबाट असन्तुष्ट बनेका र विशेषगरी नेपाली कम्युनिष्ट आन्दोलनमा देखापरेका अनेकौं त्रुटिहरुलाई सच्याएर नेपाल कम्युनिष्ट पार्टी बामपंथी केन्द्र गठन गरेको घोषणा कार्यक्रममा बताइएको छ ।
दाङको देउखुरीमा राप्ती उपत्यका अन्तरगत राप्ती गाउँपालिका वडा नम्बर १, स्थित राप्ती उद्योग बाणिज्य संघ भालुवाङको सभाहलमा पत्रकार सम्मेलन गर्दै सो नेकपा बामपंथी केन्द्र घोषणा गरिएको हो । देशैभरबाट ५१ सदस्यीय केन्द्रीय समिति रहेको दाबी गरिएको दलको प्रतिनिधित्वको रूपमा
नेता संयोजक राजकुमार कक्षपती, अध्यक्ष मुकुन्द रोका र महासचिव अर्जुन अधिकारीको नाम मात्रै सञ्चारमाध्यम मार्फत जानकारी गराएको पार्टीका अध्यक्ष मुकुन्द रोकाले बताएका छन् ।
कम्युनिष्ट सिद्धान्तका अन्य कुराहरू यथावत राख्दै माओवाद वा विचारधाराको सट्टामा माओ सिद्धान्त र मजदूर वर्गको सट्टामा श्रमिक वर्ग उल्लेख गर्ने अनि पार्टीको आवश्यकता अनुसार सत्ताशीत विद्रोह गर्ने अथवा चुनावी मैदानमा जानसक्ने पार्टीको तत्कालीन रणनीति रहेकोे नेता संयोजक राजकुमार कक्षपतीले चर्चा गरे ।
घोषणा सभामा पत्रकारहरुले राखेका जिज्ञासाहरुको अध्यक्ष रोका र नेता संयोजक कक्षपतीले पालैपालो जवाफ दिएका थिए । पार्टीका अध्यक्ष मुकुन्द रोकाको अध्यक्षतामा र नेता संयोजक राजकुमार कक्षपतीको प्रमुख आतिथ्यतामा सम्पन्न घोषणा सभा कार्यक्रमको सहजीकरण पार्टी महासचिव अर्जुन अधिकारीले गरेका थिए ।
अहिलेसम्मका कुनै पनि दल अथवा सरकारले आम नागरिकको समस्यामा खासै ध्यान नदिएको, बेरोजगारी भ्रष्टाचार र अनियमितताले नैराश्यता ल्याएको, अशिक्षा,गरीबी र भोकमरीले जनताको अवस्था दयनीय हुँदै गएको वर्तमान सन्दर्भमा आफ्नो दलको नेतृत्वमा मात्र यस्ता समस्याहरुको समाधानमा अग्रणी भूमिका खेल्ने बामपंथी केन्द्रका नेताहरुले दाबी गरेका छन् ।
