जनकपुर । मधेस प्रदेशका डिआईजी लालमणि आचार्यले बुधवार बिहान यात्रा डेलीसंग कुराकानीमा नेपाल–भारत सीमाबाट हुने तस्करीमा कुनै प्रहरी अधिकारीको संलग्नता प्रमाणित भएमा उनीहरूलाई तुरुन्त कारवाही गरिने चेतावनी दिए। उनले मधेश प्रदेशका ८ वटै जिल्लाका प्रहरी कार्यालय, ईलाका प्रहरी, र प्रहरीचौकीहरुलाई तस्करी नियन्त्रणमा विशेष ध्यान दिन निर्देशन जारी गरेका छन्।
डिआईजी आचार्यले भने, “तस्करी भईरहेको कुनै पनि प्रमाण, जस्तै भिडियो वा तस्बिर प्राप्त भएमा तत्कालै सम्बन्धित क्षेत्रका प्रहरी ईन्चार्जलाई कारवाही गरिनेछ। छानबिन प्रक्रिया सुरु हुनेछ र तस्करीमा संलग्न प्रहरी अधिकारीलाई कानूनअनुसार कारवाही गरिनेछ। यसमा कुनै सम्झौता हुनेछैन।”
विशेष गरी धनुषा लगायतका सीमावर्ती क्षेत्रमा प्रहरीकै मिलोमत्तोमा तस्करी भइरहेको जनगुनासो बढिरहँदा, आचार्यले यस विषयमा गम्भीर कदम चाल्ने संकेत दिए। उनले सीमावर्ती क्षेत्रमा हुने तस्करी नियन्त्रण गर्न कनिष्ठभन्दा पनि वरिष्ठ अधिकारीहरुलाई जिम्मेवार बनाउँदै कारवाही गर्ने बताए।
आचार्यका अनुसार, खुला सीमाका कारण तस्करी नियन्त्रण चुनौतीपूर्ण रहेको छ, तर उनले यसलाई रोक्नका लागि प्रहरी निकायलाई आवश्यक निर्देशन दिइसकेको र दोषीलाई कुनै पनि हालतमा उन्मुक्ति नदिइने प्रष्ट पारे।
लालमणि आचार्य यसअघि धनुषामा प्रहरी उपरीक्षक (एसपी)का रुपमा कार्यरत थिए, जहाँ उनले सीमा क्षेत्रमा हुने तस्करी नियन्त्रणमा प्रभावकारी भूमिका निर्वाह गरेका थिए। डिआईजी पदमा बढुवा भएपछि, उनले मधेश प्रदेशको प्रहरी प्रमुखको जिम्मेवारी सम्हालेका छन् ।
