काठमाडौं । जानकी गाउँपालिका ३ इन्द्रपुरका बसिर अलीका ९ वर्षीय छोरा अर्थान अलीको माछा मार्ने क्रममा पोखरीमा डुबेर मृत्यु भएको प्रहरीले पुष्टि गरेको छ। घरदेखि करिब १५० मिटरको दुरीमा रहेको पोखरीमा खेल्ने क्रममा अर्थान चिप्लिएर पोखरीमा डुबेका थिए।
स्थानीयवासीले खबर गरेपछि सशस्त्र प्रहरी बल नेपालका गोताखोर टोलीले खोजी कार्य थाल्यो। सशस्त्र प्रहरी बल नम्बर ३०, बाँकेका प्रमुख सशस्त्र प्रहरी उपरीक्षक (एसपी) विमल डाँगीका अनुसार, ती बालकको शव गोताखोर टोलीले पोखरीबाट निकाल्न सफल भएको हो। खोजीमा जिल्ला प्रहरी कार्यालय बाँके र सशस्त्र प्रहरी बल नेपाल बिओपि जयसपुरका सशस्त्र प्रहरी निरीक्षक ललित शाहीको नेतृत्वमा ७ जनाको टोली, साथै सशस्त्र प्रहरी बल नम्बर ४२ रिजर्भ गण शमशेरगन्जका नायब निरीक्षक टेक प्रसाद आचार्यको नेतृत्वमा ६ जनाको अर्को टोलीले सहभागिता जनाएको थियो।
सशस्त्र प्रहरीको टोलीले बालकलाई खोजी गरेर शव बाहिर निकालेपछि, मृतकको शवलाई पोष्टमार्टमका लागि भेरी अस्पताल पठाइएको छ। पोष्टमार्टम पछि शवलाई आफन्तलाई जिम्मा लगाइएको जिल्ला प्रहरी कार्यालय बाँकेले जानकारी दिएको छ। यस घटनापछि, बाँकेका प्रहरीले जनतालाई पानीको स्रोत भएका स्थानहरूमा विशेष सतर्कता अपनाउन आग्रह गरेको छ।
