नुवाकोट । सासु बुहारीको घर झगडामा सासुले बुहारीलाई तातोपानी खन्याएको आरोप लागेको छ। घटना नुवाकोट ककनी गाउँपालिका वडा नम्बर ३ को हो । चाउथेमा महिलामाथि तातोपानी खन्याएको आरोपमा प्रहरीले महिलाका सासु र श्रीमानलाई पक्राउ गरेको छ।
अहिले श्रीमान सिजन बजगाईं र उनकी आमा सीता बजगाई प्रहरी हिरासतमा छन् । उनीहरूमाथि थप अनुसन्धान भइरहेको नुवाकोट प्रहरीले जनाएको छ। सिजनकी श्रीमती कल्पना अधिकारी बजगाईमाथि तातोपानी खन्याएर अमानविय ब्यवहार गरेको आरोप लागेको छ।
आरोपित परिवारका अन्य सदस्य ससुरा रामहरि बजगाई र देउरानी फरार छिन् । उनीहरु चारै जना विरुद्ध जिल्ला प्रहरी कार्यालय नुवाकोटले अनुसन्धान अघि बढाएको छ। प्रहरीका अनुसार १५ कात्तिकमा चारै जनाको मिलेमतोमा कल्पनामाथि तातोपानी खन्याएको भन्दै उजुरी परेको छ ।
घट्ना लगत्तै पीडित बुहारी कल्पनाले प्रहरीमा जाहेरी दिएकी छिन् । सोही जाहेरीका आधारमा श्रीमान र सासु पक्राउ परेको र ससुरा र देउरानीको खोजी भईरहेको जिल्ला प्रहरी कार्यालय नुवाकोटका डीएसपी तिलक भारतीले जानकारी दिए ।
