पर्सा । बिरगंज घटनामा संलग्न भएको आरोपमा बस चालकलाई नियन्त्रणमा लिइएको छ । भारतीय सञ्चारमाध्यमका अनुसार प्रहरीले विशेष सूचनाका आधारमा यो छापामारी गरेको हो ।
भारतीय प्रहरीका डीएसपी धिरेन्द्रकुमारका अनुसार मङ्गलवार दिउँसो रामगढवा प्रहरीले एनजीएफ लेखिएको निजी स्कुल बसमा लुकाई छिपाइ राखिएको १८ वटा बन्डलमा प्याक गरिएको करिब दुई क्विन्टल अति प्रशोधित गाँजा बरामद गरेको हो । उक्त गाँजा रामगढवाबाट सुगौली पुर्याउने तयारी हुँदै गर्दा बरामद भएको बताइएको छ ।
रामगढवाका थानाध्यक्ष अमरजीतकुमारको नेतृत्वमा प्रहरीले रामगढवास्थित थाना गेटमै बसलाई रोकेर सघन तलासी गर्दा बसको डिक्कीमा लुकाइएको गाँजा फेला परेको हो । प्रहरीका अनुसार उक्त गाँजा मोतिहारीकै बेलहिया गाउँका मोहम्मद एकरामको घरबाट लोड गरिएको थियो ।
बसका चालक चडवा गाउँ निवासी लालबाबु मियाँलाई नियन्त्रणमा लिइएको छ । बरामद बस बेलहिया गाउँका मोहम्मद एकरामको स्वामित्वमा रहेको पाइएको छ, जसले बस एनजीएफ स्कुललाई भाडामा दिएका थिए । लागूऔषध कारोबारमा लामो समयदेखि सक्रिय रहेको एकराम हाल फरार रहेको बताइएको छ । उनका परिवारको राजनीतिक पहुँच रहेको पनि खुलासा भएको छ । मोहम्मद एकरामकी आमा रामगढवा क्षेत्र नम्बर ३ की पूर्व जिल्ला पार्षद् हुन् ।
भारतीय प्रहरीले बरामद गरिएको गाँजा नेपालबाट अवैध रूपमा तस्करी गरेर भारत प्रवेश गराइएको दाबी गरेको छ । उनीहरूको भनाइ अनुसार गाँजा नेपालकै पर्सा जिल्लाका विभिन्न नाका हुँदै भारततर्फ ओसारपसार गरिएको हो । बरामद गाँजाको बजार मूल्य झन्डै सात लाख रुपैयाँ रहेको छ ।
घटनाले नेपाल प्रहरीको भूमिकामाथि गम्भीर प्रश्न खडा गरेको छ । पर्सा प्रहरीले लागूऔषध र तस्करी नियन्त्रणका लागि कडा निगरानी रहेको दाबी गरिरहेको बेला ठूलो मात्रामा गाँजा पर्साका नाकाबाट भारत पुगेको भारतीय प्रहरीको दाबी छ । यसले नेपाल प्रहरीको कामकारबाही प्रभावकारी छ वा छैन भन्ने विषयमा आशङ्का उत्पन्न गरेको छ ।
भारतीय प्रहरीले सीमावर्ती क्षेत्रमा मादक पदार्थविरुद्धको अभियान अन्तर्गत एक हप्ताभित्र दुई ठूला सफलताहरू हात पारेको छ । यसअघि स्म्याक माफिया मोहम्मद असलमका सहयोगी रञ्जित यादवलाई स्म्याक निर्माणमा प्रयोग हुने रासायनिक पदार्थसहित पक्राउ गरिएको थियो । पछिल्लो सफलता भने दुई क्विन्टल गाँजाको बरामदका रूपमा आएको हो ।
गाँजा बरामद गर्ने अभियानमा सुगौली इन्स्पेक्टर अशोक कुमार पाण्डे, बेल्डरवा मठका एसआई विजय कुमार, पीएसआई सुमित कुमार, एसएसबीका जवान, चौकीदार रोशन पटेल, नवल किशोर यादवसहित दर्जनौँ प्रहरी अधिकारीहरूको सहभागिता थियो ।
घटनाले भारतीय प्रहरीको मादक पदार्थ नियन्त्रण अभियानलाई महत्त्वपूर्ण सफलता दिलाएको छ भने नेपालतर्फको सीमा क्षेत्रबाट हुने तस्करीमाथि थप निगरानीको खाँचो औँल्याएको छ ।
