बाँके । नेपालगन्ज जामा मस्जिदको संरक्षण, व्यवस्थापन तथा समुदायका हकहितका सवालमा सक्रिय भूमिका खेल्ने उद्देश्यले गठन गरिएको यस उपसंघर्ष समितिमा सचिवालय संयोजक बकर अलि राई, प्रवक्ता बाबु खा पठान, सचिव हसन खान, कोषाध्यक्ष सुल्तान खान तथा कार्यसमिति सदस्य नौसाद सल्मानीको महत्वपूर्ण भूमिका रहनेछ।
उपसंघर्ष समिति गठनका क्रममा उपस्थित पदाधिकारीहरूले मस्जिदका व्यवस्थापन, धार्मिक तथा सामाजिक समन्वय, तथा आवश्यक सुधारका विषयमा व्यापक छलफल गरेका थिए। साथै, स्थानीय समुदायसँग सहकार्य गर्दै धार्मिक तथा सांस्कृतिक गतिविधिहरूलाई प्रभावकारी रूपमा अघि बढाउने प्रतिवद्धता व्यक्त गरिएको छ।
यसैक्रममा, नेपालगन्जका विभिन्न क्षेत्रहरूमा समेत उपसंघर्ष समितिहरू गठन गर्ने निर्णयअनुसार जानकी गाउँपालिका–५, कोहलपुर नगरपालिका–४, र नेपालगन्ज उपमहानगरपालिका–१६ मा समेत उपसंघर्ष समिति गठन गरिएको छ। स्थानीय तहमा गठन भएका यी समितिहरूले समुदायका धार्मिक तथा सामाजिक सवालमा क्रियाशील रहने तथा मस्जिद व्यवस्थापनलाई प्रभावकारी बनाउन योगदान दिने लक्ष्य राखेका छन्।
संघर्ष समितिका पदाधिकारीहरूका अनुसार, जामा मस्जिदको व्यवस्थापन, विकास र संरक्षणका लागि स्थानीय समुदायको सहकार्य अपरिहार्य रहेको छ। तसर्थ, नवगठित समितिले सबै पक्षलाई समेटेर मस्जिदको हितमा कार्य गर्ने प्रतिबद्धता व्यक्त गरेको छ।
