दाङ । घोराही उपमहानगरपालिका १४ मिलन चोक बस्ने २५ वर्षीय रञ्जित रसाइलीलाई पक्राउ गरेको छ । शुक्रबार घोराहीमा लु ४६ प ६१६१ नम्बर मोटरसाइकल प्रयोग गरी अवैध रुपमा सुनको कारोबार भइरहेको भन्ने गोप्य सूचनाको आधारमा गएको प्रहरी टोलीले उनलाई पक्राउ गरेको जिल्ला प्रहरी कार्यालय दाङका प्रवक्ता एवं डीएसपी चक्रबहादुर शाहले जानकारी दिएका छन् ।
घोराही-१५ ट्राफिक चोकमा रसाइलीलाई फेला पारी खानतलासी गर्दा २ वटा सिक्री र १ वटा सानो डल्ला फेला परेको थियो । उक्त सुन तौल गर्दा ४९७.०४ ग्राम भएको र १ लाख ७ हजार ८ सय रुपैयाँ नगद पनि प्रहरीले बरामद गरेको जनाएको छ । प्रहरीले मोटरसाइकल र रसाइलीलाई नियन्त्रणमा लिई थप अनुसन्धान भइरहेको जनाएको छ ।
