प्रधानमन्त्री केपी शर्मा ओली बिसाल आम सभालाई सम्बोधन गर्न फागुन ५ गते दाङ आउँदै
दाङ । नेकपा एमालेका अध्यक्ष तथा प्रधानमन्त्री केपी शर्मा ओली भोलि सोमबार दाङ आउँदै हुनुहुन्छ । प्रधानमन्त्री पदमा बहाल रहेका बेला ओली यो समेत गरेर दाङमा दोस्रो पटक आउन लाग्नु भएको हो । यस अघि प्रधानमन्त्रीमा बहाल रहेकै समयमा २०७७ माघ १२ गते पार्टी फुटको सङ्घारमा रहेका बेला दाङको लालमटियामा आयोजित जनसभालाई सम्बोधन गर्न आउनु भएको थियो । त्यस बाहेक अन्य समयमा पनि पार्टीको अध्यक्ष लगायतका विभिन्न जिम्मेवारीमा रहँदा दाङको तुलसीपुर र घोराहीमा आयोजित जनसभालाई सम्बोधन गर्न आउनुभएको नेकपा एमाले दाङका उपाध्यक्ष मनोहर बुढाथोकीले तुलसीपुर खबरलाई जानकारी दिनुभयो ।
यस्तो छ, ओलीको कार्यक्रम तालिका
यसैबीच दाङमा रहँदा एमालेका अध्यक्ष तथा प्रधानमन्त्री ओलीले दुई वटा कार्यक्रमलाई सम्बोधन गर्ने कार्यतालिका रहेको छ । हेलिकप्टर मार्फत दाङमा आउन लाग्नु भएका ओलीले १२ः१५ बजे दाङको देउखुरी स्थित लुम्बिनी प्रदेश सभालाई सम्बोधन गर्ने कार्यक्रम रहेको छ भने दिउँसो २ बजे घोराहीको सहिद मञ्चमा आयोजित जनसभालाई सम्बोधन गर्ने कार्यक्रम रहेको उपाध्यक्ष मनोहर बुढाथोकीले जानकारी दिनुभयो ।
राप्ती स्वास्थ्य विज्ञान प्रतिष्ठानको सिनेट बैठक भने काठमाण्डौमा बस्ने तय भएको छ । यस अघि राप्ती स्वास्थ्य विज्ञान प्रतिष्ठान घोराहीमा नै बस्ने कार्य तालिका रहेको थियो । समय अभावका कारण प्रतिष्ठानको सिनेट बैठक काठमाण्डौमा बस्ने कार्य तालिका रहेको दाङका प्रमुख जिल्ला अधिकारी कृष्ण प्रसाद लम्सालले जानकारी दिनुभयो । यसैबीच सुरक्षा अवस्थालाई चुस्त राखिएको लम्सालले जानकारी दिनुभयो ।
कार्यक्रमको तयारी पुरा
यसैबीच नेकपा एमाले दाङले आयोजना गरेको बृहत जनसभाको सम्पूर्ण तयारी पुरा भएको छ । ५० हजार नागरिक उतार्ने तयारीमा रहेको एमाले दाङले घरबाट कार्यक्रम स्थलसम्म आउन जानका लागि यातायातको निःशुल्क व्यवस्था गरेको सचिव श्याम डाँगीले जानकारी दिनुभयो । सभाका लागि मञ्च व्यवस्थापन, स्वंयसेवक परिचालन, माइक तथा साउन्डसिस्टम व्यवस्थापन, प्रचारप्रसार, यातायात व्यवस्थापन लगायतका काम सम्पन्न भैसकेको छ । जनसभा अघि घोराहीका चार वटा क्षेत्रबाट बिभिन्न संस्कृति झल्कने झाँकी सहितको र्याली निकालिने छ ।
त्यसका लागि पूर्वतर्फ ट्राफिक चोक, दक्षिण तर्फ नेत्रलाल पार्क गुलरियाबाट, उत्तर तर्फ सभाहलबाट र पश्चिम तर्फ रतनपुर चोकमा जम्मा गरेर बृहत् र्याली निकालिनेछ । दिउसो १२ बजेदेखी र्याली दामोदर चोकमा एकीकृत भएर सहिद गेट हुँदै सभास्थलमा पुग्नेछ । सभामा उपस्थित हुनका लागि पार्टीको वडा कमिटी मार्फत प्रत्येक घरघरमा निमन्त्रणा समेत गरिसकेको र सयौ गाडी माफर्त हजारौ जनता सभामा सहभागी हुने एमाले दाङका सचिव डाँगीले जानकारी दिनुभएको छ ।
