काठमाडौं । गृहमन्त्रालयले चुनावलाई लक्षित गरी प्रदेश र केही जिल्लाका प्रहरी प्रमुख सरुवाको तयारी गरेको छ । कमजोर कार्यक्षमता भएका डीआईजी,एसपी र डीएसपीलाई अवधि नपुगी हटाउन लागिएको छ ।
कोशी प्रदेशमा डीआईजी पद खाली भइसकेको छ । त्यहाँ कार्यरत ईश्वर कार्की एआईजीमा बढुवा सिफारिस भइसकेका छन् । त्यस्तै, बागमतीका अरुण पौडेल, लुम्बिनीका राजेन्द्र भट्ट र कर्णालीका माधव श्रेष्ठको सरुवा हुने सम्भावना रहेको स्रोत बताउँछ ।
उनीहरुलाई यसअघि रमेश लेखकले त्यहाँ पठाएका थिए । नयाँ सरकार बनेपछि पनि तराईमा तस्करी नरोकिएको रिपोर्टिङ गृह मन्त्रालयमा छ ।
कोशी प्रदेशमा जानका लागि अबिनारायण काफ्ले लागि परेका छन् । त्यस्तै, बिनोद घिमिरे पनि प्रदेश जान लबिइङमा छन् । हालै बढुवा भएका भूपेन्द्र खत्री, ओम अधिकारी, सानुराम भट्टराईमध्येबाट पनि प्रदेश पठाउने बारे छलफल भइरहेको छ ।
त्यस्तै, तराईका जिल्लामा कार्यरत केही एसपीको पनि सरुवा गर्न लागिएको छ । बाराका एसपी सन्तोष तामाङविरुद्ध धेरै उजुरी परेका छन् । निर्वाचनलाई लक्षित गरी विगतमा चलखेलका आधारामा गएका प्रहरी इन्चार्जलाई हटाउन लागिएको छ ।
