पर्सा । बङ्गलादेशको म्यामनसिंह जिल्लामा भ्रमपूर्ण आरोपमा एक हिन्दु युवकको कुटपिट गरी हत्या गरेर शव जलाएको घटनाविरुद्ध वीरगञ्जमा हिन्दु युवाहरूले शनिवार विरोध प्रदर्शन गरेका छन् ।
प्रदर्शनकारीहरूले घटनामा संलग्नहरूलाई कडा कारबाहीको माग गर्दै बङ्गलादेश सरकारको आलोचना गरेका छन् ।
प्रदर्शनकारी हिन्दु युवाहरूले “हिन्दु मार्न पाइँदैन”, “बङ्गलादेशी मुसलमान मुर्दावाद” जस्ता नारा लगाउँदै वीरगञ्जको नगर परिक्रमा गरेका थिए । त्यसपछि घण्टाघर पुगेर उनीहरूले बङ्गलादेशको झन्डा अङ्कित तस्बिरमा आगो लगाएर आफ्नो विरोध जनाए ।
युवाहरूले बङ्गलादेशमा अल्पसङ्ख्यक हिन्दुहरू असुरक्षित रहेको र निर्मम हत्या हुँदा पनि सरकारले अपराधीहरूमाथि कारबाही नगरेको आरोप लगाएका छन् । कारबाही नभए ठूलो आन्दोलन गर्ने चेतावनी समेत दिएका छन् ।
घण्टाघरमा आयोजित कोणसभालाई सम्बोधन गर्दै हिन्दु युवा नेता विकास साहले बङ्गलादेशमा यसअघि पनि अल्पसङ्ख्यक हिन्दुहरूमाथि दमन भएको स्मरण गराए । उनले हिन्दुहरू शान्तिप्रेमी धर्म भएको बताउँदै विश्वको कुनै पनि कुनामा हिन्दुमाथि हुने अत्याचार र हिंसा सहन नसकिने चेतावनी दिए । “बङ्गलादेश सरकारले हिन्दुहरूको सुरक्षाको ग्यारेन्टी गर्नुपर्छ,” साहले भने ।
