काठमाडौं । केही दिनदेखि तराई–मधेश क्षेत्रमा अत्यधिक रूपमा बढेको चिसोका कारण हाइपोथर्मिया र जलनका बिरामीको संख्या उल्लेख्य रूपमा बढ्न थालेको छ। प्रादेशिक अस्पताल जनकपुरधाममा यस्ता बिरामीहरू उपचारका लागि दैनिक ठूलो संख्यामा आउन थालेका छन्।
अस्पतालका अनुसार दैनिक औसत चारदेखि पाँच सयसम्म बिरामी उपचारका लागि आउने गरेका छन्, जसमध्ये ठूलो हिस्सा चिसोबाट प्रभावित रहेका छन्। तीमध्ये हाइपोथर्मिया, जलन, भाइरल निमोनिया, कोल्ड डायरिया, दम एट्याक र समझ हर्ट एट्याकका बिरामीको संख्या बढी देखिएको प्रादेशिक अस्पताल जनकपुरधामका निर्देशक डा. जामुन सिंहले जानकारी दिए।
डा. सिंहका अनुसार अस्पतालमा उपचारका लागि आउने अधिकांश बिरामी गरिब, मजदुर, वृद्ध–वृद्धा, बालबालिका तथा खुला स्थानमा बसोबास गर्ने ग्रामीण क्षेत्रका नागरिक रहेका छन्। “अहिले आउने बिरामीमध्ये हाइपोथर्मिया, जलन र भाइरल निमोनियाका बिरामी बढी छन्,” उनले भने, “बाहिरी चिसोको प्रभावले शरीरको तापक्रम घट्दा हाइपोथर्मिया हुन्छ भने चिसो छल्न आगो ताप्ने क्रममा जलनका घटना बढेका छन्।”
डा. सिंहले हाइपोथर्मियालाई शरीरको तापक्रम ३७ डिग्री सेल्सियसभन्दा तल झर्नुका रूपमा व्याख्या गरे। उनका अनुसार लामो समयसम्म अत्यधिक चिसो वातावरणमा बस्दा शरीरले आफैंलाई न्यानो राख्न नसक्दा यस्तो समस्या देखिन्छ। “मधेश क्षेत्रमा घरभित्र दाउरा, कोइला र गोइँठाको आगो बालेर झ्याल–ढोका बन्द गर्दा धुवाँ बाहिर ननिस्कने अवस्था सिर्जना हुन्छ,” उनले भने, “यसबाट निस्किने कार्बन मोनोअक्साइड शरीरमा प्रवेश गर्दा सास फेर्न समस्या, बेहोसी, हर्ट एट्याकसम्म हुने जोखिम बढ्छ।”
कुहिरो, चिसो हावा, पर्याप्त न्यानो लुगा नलगाउनु, भिजेको कपडा लगाएर बस्नु, राति खुला स्थानमा सुत्नु र पोषणको कमी हाइपोथर्मियाका प्रमुख कारण रहेको चिकित्सकहरूको भनाइ छ। नवजात शिशु, साना बालबालिका, वृद्ध–वृद्धा, गरिब, दैनिक ज्यालादारी मजदुर, सडकमा बसोबास गर्ने व्यक्ति, दीर्घरोगी, कुपोषित व्यक्ति र गर्भवती महिला यसबाट बढी प्रभावित हुने गरेका छन्। “यी समूहमा शरीरको ताप सन्तुलन गर्ने क्षमता कमजोर हुने भएकाले हाइपोथर्मिया छिटो देखिन सक्छ,” डा. सिंहले बताए।
