बाँके । खुला सीमा क्षेत्रमा विशेष सतर्कता अपनाउन आग्रह गरिएको छ। यस सन्दर्भमा स्वास्थ्य कार्यालय सिरहाले स्थानीय तहहरूलाई पत्राचार गर्दै आवश्यक सावधानी र निगरानी बढाउन निर्देशन दिएको छ।
स्वास्थ्य कार्यालय सिरहाका जनस्वास्थ्य प्रशासक कृष्णदेव यादवका अनुसार निपा भाइरस फैलिएको क्षेत्र भ्रमण गरेर फर्किएका व्यक्तिहरूलाई निश्चित समयका लागि क्वारेन्टाइनमा बस्न सुझाव दिइएको छ। साथै समुदायमा आधारित रोग निर्देशिका २०८२ अनुसार यस्ता व्यक्तिहरूको स्वास्थ्य अवस्था नियमित रूपमा निगरानी गर्न स्थानीय तहलाई आग्रह गरिएको छ।
खुला सीमा भएका कारण नेपाल–भारत आवतजावत सहज रहेकाले सीमावर्ती जिल्लामा संक्रमण फैलिन सक्ने जोखिमलाई ध्यानमा राख्दै निगरानी संयन्त्र सक्रिय बनाइएको जनाइएको छ। सीमावर्ती क्षेत्रमा स्वास्थ्यकर्मीहरूलाई सचेत रहन तथा शंकास्पद लक्षण देखिएका व्यक्तिहरूको तुरुन्त पहिचान र परीक्षणको व्यवस्था मिलाउन निर्देशन दिइएको छ।
भारतीय अधिकारीहरूले निपा भाइरसको प्रकोप नियन्त्रणमा आएको घोषणा गरे पनि जोखिम पूर्ण रूपमा समाप्त नभएको जनाइएको छ। त्यसैले संक्रमण फैलिन नदिन सतर्कता, जनचेतना र नियमित स्वास्थ्य अनुगमनलाई अझ प्रभावकारी बनाउनु आवश्यक रहेको स्वास्थ्य अधिकारीहरूले बताएका छन्।
