काठमाडौं । दानबहादुर कार्कीले देशभरका प्रहरी इकाइलाई कडा सन्देश दिँदै अपराध नियन्त्रणमा सक्रियता बढाउन निर्देशन दिनुभएको छ। उहाँले स्पष्ट शब्दमा भन्नुभयो—अपराधिक गतिविधिमा संलग्न व्यक्तिलाई पक्राउ गर्न माथिल्लो आदेश कुर्नु आवश्यक छैन, कानुनअनुसार तुरुन्तै कारबाही अघि बढाउनुपर्छ।
शुक्रबार नेपाल प्रहरी प्रधान कार्यालयबाट भर्चुअल माध्यममार्फत सम्बोधन गर्दै आईजीपी कार्कीले आसन्न निर्वाचनलाई राष्ट्रिय संकल्पका रूपमा लिएर भयरहित, निष्पक्ष र विश्वसनीय वातावरणमा सम्पन्न गराउन भरपर्दो सुरक्षा योजना कार्यान्वयन गर्न आग्रह गर्नुभयो। उहाँले सम्भावित सुरक्षा चुनौतीबारे समयमै सूचना संकलन, विश्लेषण र प्रभावकारी प्रहरी परिचालनमा जोड दिनुभयो।
निर्वाचन आचारसंहिता उल्लङ्घन गर्ने तथा अवाञ्छित गतिविधिमा संलग्न व्यक्तिहरूलाई कानुनी दायरामा ल्याउन उच्च सतर्कता अपनाउन निर्देशन दिँदै उहाँले अन्य सुरक्षा निकाय र सरोकारवाला पक्षसँग निरन्तर समन्वय र सहकार्य आवश्यक रहेको बताउनुभयो।
प्रहरी कर्मचारीलाई तटस्थ, इमानदार र व्यावसायिक ढंगले जिम्मेवारी निर्वाह गर्न निर्देशन दिँदै आईजीपी कार्कीले निर्वाचन अवधिमा खटिने अतिरिक्त प्रहरी जनशक्तिको उचित व्यवस्थापन र परिणाममुखी परिचालनमा विशेष ध्यान दिन आग्रह गर्नुभयो। साथै, निर्वाचन प्रहरीका गुनासा सम्बोधन र उनीहरूप्रति संवेदनशील व्यवहार अपनाउन समेत जोड दिइएको छ।
