काठमाडौं । बालेन्द्र शाह उर्फ बालेन झापा क्षेत्र नम्बर ५ बाट प्रतिनिधि सभा चुनावको मैदानमा छन्। काठमाडौं महानगरपालिकाको मेयर पदबाट राजीनामा दिएर चुनावी अभियानमा होमिएका शाह यतिबेला देशदौडाहमा व्यस्त छन्।
चुनावी मैदानमा उत्रिएसँगै शाहमाथि सामाजिक सञ्जाल र विभिन्न अनलाइन माध्यममा अनेक टिकाटिप्पणी भइरहेका छन्। पछिल्लो समय उनको नाम जोडेर ‘नागरिकता किर्ते’ सम्बन्धी आरोप सार्वजनिक भएको छ।
५ फागुनमा एक अनलाइन माध्यमले ‘कानूनविपरीत थर फेरेर नागरिकताको प्रतिलिपि लिएको’ आशयको समाचार प्रकाशित गरेपछि उक्त विषयले चर्चा पाएको छ। त्यसपछि अन्य केही मिडियाले पनि सोही सामग्रीलाई आधार मानेर शाहविरुद्ध सरकारी कागजात किर्ते गरेको आरोपमा जिल्ला प्रहरी परिसर, भद्रकालीमा जाहेरी दर्ता भएको दाबी गर्दै समाचार लेखे।
समाचारहरूमा शाहले ‘साह’ थरलाई ‘शाह’ बनाउँदै नागरिकतामा अनधिकृत संशोधन गराएको आरोप उल्लेख गरिएको छ।
तर, शाहविरुद्ध नागरिकता किर्ते आरोपमा प्रहरीमा जाहेरी परेको भन्ने समाचार सार्वजनिक भइरहेका बेला जिल्ला प्रहरी परिसर काठमाडौंले त्यस्तो कुनै उजुरी दर्ता नभएको जनाएको छ।
जिल्ला प्रहरी परिसर काठमाडौंका प्रमुख एवं वरिष्ठ उपरीक्षक (एसएसपी) रमेश थापासँग प्रत्यक्ष सम्पर्क गर्दा उनले हालसम्म यस विषयमा कुनै पनि जाहेरी दर्ता नभएको स्पष्ट पारे। ‘केही मिडियामा जाहेरी परेको भन्ने समाचार देखियो, तर हाम्रो कार्यालयमा त्यस्तो कुनै उजुरी दर्ता भएको छैन,’ उनले बताए।
चुनावी माहोल तातेका बेला विभिन्न आरोप-प्रत्यारोप सार्वजनिक भइरहेका छन्। यद्यपि, प्रहरीको आधिकारिक भनाइअनुसार बालेन्द्र शाहविरुद्ध नागरिकता किर्तेसम्बन्धी कुनै जाहेरी परेको छैन।
