काठमाडौं । जापानको Ichikawa City Zoo मा रहेको ६ महिनाको माकाक बाँदर ‘पञ्च’ को कथा यतिबेला सामाजिक सञ्जालमा भावुक सहानुभूतिको विषय बनेको छ। आमाबाट अस्वीकार भएपछि नरम खेलौनालाई अँगालो हालेर बस्ने पञ्चको दृश्यले धेरैको मन छोएको छ।
सन् २०२५ जुलाई २६ मा जन्मिएको पञ्च जन्मिँदा केवल ५०० ग्राम तौलको थियो। जापानी सञ्चारमाध्यमका अनुसार पहिलोपटक आमा बनेकी उसकी आमाले जन्मिएलगत्तै पञ्चलाई स्वीकार नगरेपछि जूका हेरचाहकर्ताहरूले उसको संरक्षण र पालनपोषणको जिम्मा लिएका थिए।
आमाको स्नेहको अभाव पूर्ति गर्न पञ्चलाई तौलिया र नरम खेलौनाहरू दिइएको थियो। तीमध्ये ओराङ्गुटानको खेलौनासँग उसले विशेष आत्मीयता बनाएको देखिन्छ। पञ्च सुत्दा, डर लाग्दा वा नयाँ ठाउँमा जाँदा पनि उक्त खेलौनालाई सधैँ अँगालो हालेर साथमै राख्ने गर्छ।
पञ्चका तस्बिर तथा भिडियोहरू सार्वजनिक भएसँगै #HangInTherePunch ह्यासट्याग सामाजिक सञ्जालमा ट्रेन्ड भइरहेको छ। प्रयोगकर्ताहरूले पञ्चप्रति माया, सहानुभूति र समर्थन व्यक्त गरिरहेका छन्।
विशेषज्ञहरूका अनुसार यो घटनाले जनावरहरूमा पनि माया, सुरक्षा र भावनात्मक सम्बन्धको महत्व कति गहिरो हुन्छ भन्ने स्पष्ट देखाएको छ।
