दैलेख अदालतले जातीय भेदभाव कसूरमा १० हजार जरिवाना

प्रकशित मिति : १६ माघ २०७६, बिहीबार १०:४८

(भावना हमाल)
दैलेख माघ १६ नारायण नगरपालिका १० भवानीकी २४ वर्षीया राजकुमारी न्यौपानेलाई जातीय भेदभाव कसूरमा दैलेख जिल्ला अदालतले १० हजार रुपैंयाँ जरिवाना र पीडितलाई २५ हजार क्षतिपूर्ति तिर्नुपर्ने फैसला गरेको छ ।
जिल्ला न्यायाधीश दण्डपाणी लामिछानेको एकल इजलासबाट सोमवार सो फैसला भएको जिल्ला अदालतका सूचना अधिकारी बिनोद आचार्यले जानकारी दिए ।
०७६ वैशाख ११ गते दिउँसो सार्वजनिक धारामा पानी भर्ने क्रममा प्लाष्टिकको जर्किन छोइएको भन्दै ३५ वर्षीया लक्षिमा सुनारलाई आरोपित न्यौपानले टाउकोमा हसिया प्रहार गरिएको चोटका कारण नेपालगञ्ज पुगेर उपचार गर्नुपरेको थियो ।
घटना लगतै भागेकी आरोपित न्यौपानेलाई ४ महिनापछि सुर्खेतमा आफन्तको घरमा लुकीछिपी बसेको अवस्थामा प्रहरीले साउन २८ गते पक्राउ गरेको थियो । प्रहरीले २ साता हिरासतमा राखी अनुसन्धान सकेर भदौ ११ गते जिल्ला अदालतमा मुद्दा पेश गरेको थियो ।
प्रहरी अनुसन्धानपछि जिल्ला सरकारी वकील कार्यालय मार्फत अदालतमा पेश भएको जातीय भेदभाव तथा छुवाछूत मुद्दामा अदालतले आरोपित न्यौपानेलाई ३० हजार रुपैंयाँ धरौटीमा छोडेको थियो ।
आरोपित राजकुमारी न्यौपाने लुकी बसेको समयमा नारायण नगरपालिका–१० वडाध्यक्ष लोकबहादुर थापा र नेकपाका नगर कमिटी अध्यक्ष लोमन शर्माले पीडित पक्षलाई प्रहरीमै बयान सुधार गर्न दवाव दिएको विषयले राष्ट्रिय मिडिया चर्चा पाएको थियो ।
जिल्ला सरकारी वकील कार्यालयले सार्वजनिक धारामा विभेद भएको घटना मात्र अभियोजन गरिएको कारण मुद्दा होष्टाइल गराउन खोजिएको विषयमा अदालतले केही बोलेको छैन । छुवाछूतको व्यवहार मात्र नभई हतियार प्रहार समेत भएको घटनामा यो सजाय कम भएको अधिकारकर्मी पत्रकार विशाल सुनारको प्रतिक्रिया छ ।

प्रकशित मिति : १६ माघ २०७६, बिहीबार १०:४८