दाङ । मनसुन पूर्वतयारी तथा प्रतिकार्य योजना – २०८३ सम्बन्धी अन्तर–विषयगत क्षेत्र बैठक दाङको राप्ती उपत्यका (देउखुरी) मा मंगलबार अपरान्ह सम्पन्न भएको छ । लुम्बिनी प्रदेश सरकार, आन्तरिक मामिला तथा कानून मन्त्रालयको आयोजना तथा सुपरपरियोजना युनिसेफको समन्वयमा उक्त बैठक सम्पन्न भएको हो ।
मन्त्रालयका सचिव सुशिला अर्यालको अध्यक्षतामा भएको बैठकमा मनसुनजन्य विपद् तथा सम्भावित जोखिमको पूर्वानुमान गर्दै त्यसबाट हुन सक्ने जनधनको क्षति न्यूनीकरणका लागि सम्बन्धित निकायहरूबीच समन्वय र सहकार्यलाई थप प्रभावकारी बनाउने विषयमा छलफल गरिएको थियो ।
कार्यक्रममा विभिन्न मन्त्रालयका प्रतिनिधि, सरकारी तथा गैरसरकारी कार्यालयका प्रमुख तथा प्रतिनिधि, सुरक्षा निकाय, स्वास्थ्य, खानेपानी, कृषि, शिक्षा, सञ्चार तथा विपद् व्यवस्थापनसँग सम्बन्धित सरोकारवालाहरूको सहभागिता रहेको थियो ।
बैठकमा सहभागीहरूले बाढी, पहिरो, डुबान तथा अन्य प्राकृतिक विपद्का समयमा तत्काल उद्धार, राहत वितरण, सूचना आदान–प्रदान र आवश्यक स्रोत–साधन व्यवस्थापनलाई चुस्त बनाउन साझा योजना अनुसार अगाडि बढ्नुपर्नेमा जोड दिएका थिए।
मन्त्रालयले मनसुनको समयमा हुन सक्ने सम्भावित विपद्को जोखिम न्यूनीकरण गर्न स्थानीय तह, सुरक्षा निकाय र विभिन्न क्षेत्रगत समूहबीच नियमित समन्वय, पूर्वतयारी र प्रतिकार्य प्रणालीलाई मजबुत बनाउँदै लैजाने बताएको छ ।
बैठकमा जल तथा मौसम विज्ञान कार्यालय कोहलपुरका प्रमुख रामप्रसाद अवस्थी, पिपुल इन्निड प्रवेश गौतमले सहजीकरण गरेका थिए ।
त्यस्तै सुपर परियोजना युनिसेफका प्रदेश संयोजक डम्मर बोहराले मनसुन पूर्वतयारी तथा प्रतिकार्य योजना २०८३ को मस्यौदाको प्रस्तुतिकरण सहितको सहजीकरण गरेका थिए । बैठकको सञ्चालन मन्त्रालयका विपद् फोकल पर्सन भुपबहादुर मल्लले गरेका थिए ।
