(सर्मिला बोगटी)
धनगढी । टिकापुर लकडाउनका कारण सीमावर्ती बजारसम्म सहज आवागमन नभएपछि भारतीय नागरिकले नै लागुऔषध सीमा क्षेत्रसम्म पुर्याउने गरेका छन्। लागुऔषध खरिदका लागि कारोवारी र सेवनकर्ता सीमा क्षेत्रमै पुग्ने गरेको पाईएको छ।
कोरोनाका कारण शैक्षिक संस्था बन्द भएपछि धेरैजसो युवायुवतीहरु लागुऔषधको दुर्व्यसनमा फसेका छन्। युवायुवतीहरु लागुऔषध दुव्र्यसनमा फसेपछि विभिन्न अपराधिक क्रियाकलापका घटना समेत बढेका छन्। प्रहरीका अनुसार लागुऔषध दुर्व्यसनमा संलग्न १५ देखि ३५ वर्ष उमेरका धेरै छन्। पछिल्लो समय लागुऔषध दुर्व्यसनमा फस्नेमा युवासँगै युवतीको संख्या समेत त्यत्तिकै बढेको छ।
लागुऔषध कारोवारमा महिलाहरुको संलग्नता समेत धेरै देखिएको छ। उनीहरुमाथि सुरक्षाकर्मीले शंका नगर्ने अनुमानका आधारमा महिलाहरु लागुऔषध कारोवारमा संलग्न हुने गरेको पाईएको छ।
इलाका प्रहरी कार्यालय टीकापुरले लागुऔषध कारोवारमा संलग्न यस्तै एक कारोवारी महिलालाई पक्राउ गरेको छ। टीकापुर नगरपालिका–६ भर्तापुरकी २४ वर्षीया सुमन चौधरी लागुऔषधसहित पक्राउ परेकी हुन्। प्रहरीले उनको पसलबाट ६०० थान नाइट्राभेट–टेन र ९६ थान स्पास्प्रोक्स क्याप्सुल बरामद गरेको छ।
प्रहरीका अनुसार चाउचाउको पेटीभित्र लुकाएर राखेको अवस्थामा लागुऔषध बरामद भएको हो। पक्राउ परेकी ती महिलाले आफूलाई यस बारेमा कुनै जानकारी नभएको बताएकी छन्। उनले श्रीमान लौटन चौधरीलाई जानकारी हुने बताईन्। उनका श्रीमान हाल फरार छन्।
सोही ठाउँका २५ वर्षीय दिलिप राई लागुऔषधसहित पक्राउ परेपछि प्रहरीले चौधरीको पसलमा छापा मारेको बताएको छ। प्रहरीले राईलाई टीकापुर नगरपालिका–३ रामपुरबाट पक्राउ गरेको हो। उनको साथबाट प्रहरीले ६० थान नाइट्राभेट–१० र १६ थान स्पास्प्रोक्स क्याप्सुल बरामद गरेको छ।
पक्राउ परेका राईले चौधरीको पसलबाट खरिद गरेको जानकारी दिएपछि प्रहरीले छापा मारेको थियो। उनीहरु दुवैजनालाई लागुऔषध कारोवार अन्तर्गत मुद्दा चलाईने इलाका प्रहरी कार्यालय टीकापुरका प्रहरी प्रमुख डिएसपी प्रकाश सापकोटाले जानकारी दिए।
यस्तै जेठ ३ गते समेत प्रहरीले लागुऔषध ओसारपोसारमा संलग्न थप दुई महिलालाई पक्राउ गरेको थियो। पक्राउ पर्नेमा टीकापुर नगरपालिका–७ बैदीका दिलु रिमाल (२४) र राधा पाण्डे (१९) रहेका छन। प्रहरीले उनीहरुको साथबाट ९ ग्राम ९५० मिलिग्राम ब्राउन सुगर बरामद गरेको थियो।
उनीहरुले प्रहरीसँगको बयानमा एक भारतीय नागरिकबाट ३४ हजार रुपैयाँमा सीमा क्षेत्रबाट खरिद गरेर ल्याएको बताएका थिए। प्रहरीले उनीहरु उपर लागुऔषध ओसारपोसारको मुद्दा दायर गरेको छ। हाल उनीहरु दुवैजना प्रहरी हिरासतमा रहेका छन्।
जिल्ला प्रहरी कार्यालय सिन्धुपाल्चोकबाट हालै इलाका प्रहरी कार्यालय टीकापुरको इञ्चार्जका रुपमा सरुवा भई आएका डिएसपी सापकोटाले लागुऔषध नियन्त्रण आफ्नो प्रमुख जिम्मेवारी हुने प्रतिवद्धता व्यक्त गरे।
सञ्चारकर्मीहरुसँगको परिचयात्मक कार्यक्रममा डिएसपी सापकोटाले समाजलाई लागुऔषधमुक्त बनाउने प्रहरीको अभियानमा साथ दिन आग्रह गरे। उनले प्रहरीको एक्लो प्रयासले मात्रै समाज सुधारको दिशामा अघि नबढ्ने बताउँदै सबैको हातेमालो आवश्यक रहने बताए। नागरिक दैनिकबाट
