(ABC-Sanchar)
दाङ । नेपाल पत्रकार महासंघ दाङ शाखाले लुम्बिनी प्रदेश सरकारले ल्याएको सञ्चार विधेयक पुनर्लेखनको माग गर्दै मुख्यमन्त्रीलाई ज्ञापन पत्र पठाएको छ । महासंघ दाङ शाखाले आइतवार प्रमुख जिल्ला अधिकारी रामबहादुर कुरुम्वाङमार्फत मुख्यमन्त्री शंकर पोखरेललाई ज्ञापनपत्र पठाएको हो ।
पत्रकार महासंघ लुम्बिनी प्रदेश समितिको आह्वानमा प्रदेशका १२ वटै जिल्लाका पत्रकार महासंघले मुख्यमन्त्रीलाई यस्तो ज्ञापनपत्र पठाएका हुन् । ज्ञापनपत्रमा महासंघले लुम्बिनी प्रदेश सरकारले प्रदेश सभामा पठाएको सञ्चार माध्यम सम्बन्धमा व्यवस्था गर्न बनेको विधेयकले सञ्चारमाध्यम र सञ्चारकर्मीहरुलाई दण्ड जरिवानादेखि जेस सजायसम्मको प्रावधान राखेर लोकतान्त्रिक व्यवस्था ल्याउनका लागि सञ्चारमाध्यम र सञ्चारकर्मीहरुले खेलेको भूमिका विर्सिएर मिडिया र मिडियाकर्मीहरुमाथि कानुनी डण्डा चलाउने सोंच झल्किएको भनेको छ ।
महासंघले उक्त विधेयक तत्काल प्रदेशसभाबाट फिर्ता गरेर पुनर्लेखनको वातावरण मिलाउन माग गरेको छ । ज्ञापनपत्रमा भनिएको छ, ‘सञ्चारमाध्यम र सञ्चारकर्मीहरुको मर्म र धर्म बुझेका मुख्यमन्त्रीले तत्काल सरोकारवालाहरुसँग छलफल गराएर सञ्चारमैत्री विधेयक निर्माणको वातावरण बनाउनु हुनेछ भन्ने अपेक्षा छ ।’ मागको सुनुवाई नभए थप आन्दोलनका कार्यक्रम गर्ने महासंघले वताएको छ । महासंघ प्रदेस समितिले उक्त सञ्चार विधेयकको विरोधमा प्रदेश सभा चल्दा कालोपट्टी बाँधेर विरोध जनाउने निर्णय गरिसकेको छ ।
