ABC (क्राईमबिट)
बर्दिया । गेरुवा गाउँपालिका–६ का १२ वर्षिय संजिप विक, उनकी बहिनी ८ वर्षिय दिलमाया विक र राजापुर नगरपालिका–८ का २८ वर्षिय लालता चौधरी बेपत्ता भएका छन् । उनीहरु तीनै जना नुहाउने क्रममा नदीमा बेपत्ता भएका छन् ।
गेरुवा गाउँपालिका–६ का एकै घरका दाजु बहिनी कर्णाली नदीमा नुहाउने क्रममा बेपत्ता भएका छन् भने राजापुरका –८ का चौधरी बुढी खोलामा नुहाउने क्रममा बेपत्ता भएका छन् ।
दाजु बहिनी कर्णाली नदीको सैजना घाटमा नुहाउने क्रममा बेपत्ता भएका हुन् । उनीहरु खेल्न जान्छु भनेर घरबाट निस्केका थिए ।
छोरा छोरी बेपत्ता भएपछि विकको परिवारसहित गाउँ नै शोकमग्न बनेको छ । बेपत्ता बालबालिका र चौधरीको खोजी कार्य भईरहेको जिल्ला प्रहरी कार्यालय बर्दियाका प्रहरी प्रमुख एसपी ईश्वर कार्कीले बताए ।
प्रहरी र स्थानीयको सहभागितामा खोजी कार्य भईरहेको छ । नदीमा पानी धमिलो रहेकोले जालको सहयोगमा खोजी कार्य भईरहेको बर्दिया प्रहरी प्रमुख एसपी कार्कीले जानकारी दिनुभएको छ ।
