(ABC-Sanchar)
बाँके । पछिल्लो २४ घण्टामा बाँकेमा गरिएको परीक्षणमा थप ८५ जनामा कोरोना संक्रमण पुष्टि भएको थियो । जिल्लामा रहेका तीन वटा प्रयोगशालामा गरिएको परीक्षणमा थप ५३ जनामा संक्रमण देखिएको जिल्ला कोभिड १९ व्यवस्थापन केन्द्र बाँकेले जनाएको छ ।
तीन वटा प्रयोगशालामा १ सय ३ जनाको नमूना परीक्षण गर्दा ५३ जनामा संक्रमण पुष्टि भएको हो । भेरी अस्पताल नेपालगन्जमा ४४ नमुना परीक्षण गर्दा २८ जना, मेडिकल कलेज कोहलपुरमा ३४ नमुना परीक्षण गर्दा १६ र बागेश्वरीको ल्याबमा गरिएको २५ नमुना परीक्षणमा ९ जनामा संक्रमण पुष्टि भएको थियो ।
संक्रमित पुष्टि भएकामध्ये बाँकेका १४ महिला र २५ पुरुष गरेर ३९ जना रहेको कोरोना फोकल पर्सन तेज ओलीले जानकारी दिए । योसँगै बाँकेमा कूल संक्रमितको संख्या १८ हजार ६ सय ६२ पुगेको छ ।
शनिबार थपिने नयाँ संक्रमितहरुमा नेपालगन्ज, खजुरा, डुडुवा र कोहलपुरका धेरै रहेको जिल्ला कोभिड १९ व्यवस्थापन केन्द्र बाँकेले जनाएको छ । यस्तै जमुनाह नाकामा रहेको हेल्थ डेस्कमा शनिबार थप ३२ जनामा संक्रमण देखिएको थियो ।
भारतका विभिन्न सहरबाट आएका ३१५ जना मानिसहरुको एन्टिजेन परीक्षण गर्दा ३२ जनामा कोरोना देखिएको हो । शनिबार बाँकेमा थप २ जनामात्र कोरोना जितेर डिस्चार्ज भएका थिए । हालसम्म जिल्लामा कोरोना संक्रमित हुने संख्या १८ हजार १ सय ६३ पुगिसकेको छ ।
