ABC (क्राईमबिट)
काठमाडौं । आइतबार प्रहरी प्रधान कार्यालयले १८ एसपीको सरुवा निकालेको केही समयमै सरुवा संशोधन गरेको छ । सरुवामा सात जिल्लाका एसपी फेरिएकोमा गुल्मीको एसपीमा हेरफेर भएको हो ।
सुरुमा गुल्मीमा दीपक कुमार बस्नेतलाई पठाइएको थियो । तर, एकैछिनमा संशोधन गरी एसपी भिम दाहाललाई गुल्मीमा पठाइएको थियो । एसपी बस्नेत यसअघि पनि गुल्मी बसेको खुलेपछि सरुवा सूची संशोधन गरिएको हो ।यसरी सरुवा संशोधन गरिएपछि सरुवाको सूची नै प्रमुख मुख्यालयले आफ्नो वेभसाइटमा सार्वजनिक गरेको छैन । तर, यससम्बन्धि परिपत्र भने भइसकेको छ ।
सरुवामा जिल्ला इन्चार्ज पाउनेहरुमा बदनामहरु छन् । बाग्लुङमा दयानिधी ज्ञवालीलाई पठाइएको छ । उनी यसअघि घुसकाण्डमा परेका थिए । त्यस्तै बाग्लुङबाट गत वर्ष कारबाही स्वरुप हटाइएका शारदा चौधरीलाई डोटी पठाइएको छ ।
गोरखा पठाइएका एसपी केदार खनाल पनि पटक पटक कारबाहीमा परेका थिए । कीर्तिपुर वृत्तको डिएसपी हुँदा कार्यालयमै मदिरा पिएको खुलेपछि तत्कालिन एसएसपी रमेश खरेलले उनलाई पक्राउ गरेर थुनेका थिए । 
धनकुटा पठाइएका लक्ष्मीराज अधिकारी कार्यक्षमतामा कमजोर मानिन्छन् । सिन्धुली पठाइएका विमलराज कँडेल पनि पटक पटक कारबाही भोगेका अधिकृत हुन् । गृहमन्त्री बालकृष्ण खाणको गृहजिल्ला रुपन्देही सरुवा गरिएका रबिन्द्र रेग्मी तुलनात्मक रुपमा व्यवसायिक मानिन्छन् । गृह जिल्ला भएकाले दबाब थेगेर काम गर्न उनलाई समस्या हुनसक्ने देखिन्छ ।
