ABC (क्राईमबिट)
काठमाडौं । सामाजिक सञ्जालको दुरुपयोग गरी महिलाको चरित्र हत्या गर्ने एक किशोरलाई प्रहरीले पक्राउ गरेको हो । पीडितको उजुरीको आधारमा सप्तरीको सुरुङ्गा नगरपालिका वडा नम्बर १ बस्ने १९ वर्षीय सुमितकुमार थापालाई प्रहरीले पक्राउ गरेको हो ।
किशोरले फेसबुकमा समिरा शर्मा (बेबी) नामको फेक आईडी बनाई उक्त आइडीको वालमामा पीडितको तस्विरको साथमा अन्य अपरिचित महिलाको अश्लील तस्बिर राखेर पोस्ट गरेर चरित्र हत्या गरेको साइबर ब्यूरोले जनाएको छ । अनर्गल, अश्लील शब्दहरु स्टाटस लेख्नुका साथै पीडितको आफन्तहरूले प्रयोग गर्ने फेसबुकको मेसेन्जरमासमेत अश्लील म्यासेज पठाएर हरानी दिएपछि पीडितले प्रहरीमा उजुरी दिएकी थिइन् ।
उनलाई इलाका प्रहरी कार्यालय भेडिया सप्तरीको सहयोगमा पक्राउ गरेर अनुसन्धान थालिएको छ । काठमाडौं जिल्ला अदालतको सोमबारको आदेशले ७ दिन म्याद थप भई आवश्यक अनुसन्धान कार्य थालिएको ब्युरोका प्रहरी उपरीक्षक भाग्येन्द्र पुरुष ढकालले जानकारी दिए ।
