ABC (क्राईमबिट)
झापा । फल्स बटम बनाएर सामान तस्करी गरेको आरोपमा सशस्त्र प्रहरी बलले झापाबाट यात्रुवाहक बसलाई नियन्त्रणमा लिएको छ । मेचीनगर नगरपालिका–१० निन्दापुलस्थित पूर्व पश्चिम लोक मार्गमा काँकडभिट्टाबाट विराटनगर जाँदै गरेको मे १ ख २७३९ नम्बरको बसलाई नियन्त्रणमा लिइएको सशस्त्र प्रहरी बलका प्रवक्ता (एसएसपी) पुरुषोत्तम थापाले रातोपाटीलाई बताए । फल्स बटन बनाई भन्सार छलेर ल्याएको जुत्ता, चप्पल, खाद्यान्न सामग्री, विविध पेय पदार्थ र तामाका भाँडा सशस्त्रले बरामद गरेको छ । करिब २ लाख ५० हजार मूल्य बराबरको सामान बरामद गरेर कानुनी कारबाही गर्न मेची भन्सार कार्यालय काँकडभिट्टामा बुझाएको एसएसपी थापाले जानकारी दिए ।
सशस्त्र प्रहरी बल नम्बर–२ हेडक्वार्टर भद्रपुरबाट खटिएको टोलीले सो बस नियन्त्रणमा लिएको हो । सार्वजनिक बसको अगाडी र पछाडि चक्काको बीचमा फल्स बटम बनाएर तस्करी गरेको भेटिएको छ ।
