(ABC-Sanchar) दाङ । घोराहीको तुलसीपुर चोकदेखि कटुवाखोलासम्मको सडक अलपत्र पारेको भन्दै स्थानीयले सडक डिभिजन कार्यालय दाङमा विरोध प्रर्दशन गरेका छन् । सामाजिक अभियान्ता तथा दाङ उद्योग वाणिज्य संघका निवर्तमान अध्यक्ष नारायण भुसाल र चित्रकान्त आचार्यको नेतृत्वमा भएको विरोध प्रर्दशन टोलीले सडक डिभिजन कार्यालयको गेटमा एक घण्टा ताला लगाएको थियो ।
उक्त सडक २०७७ सालदेखि अलपत्र अवस्थामा रहेता पनि सडक हालसम्म पनि निर्माण भएको छैन् । ‘नयाँ सम्झौता पनि छैन्, धरौती जफत गरेर काम पनि सम्पन्न गर्दैनन्, ठेक्का पनि तोड्दैनन्, कालो सूचीमा पनि हाल्दैन् डिभिजन कार्यालयले । कि म्याद थप गर्नु पर्यो कि कालो सूचीमा राख्न पर्यो, कि ठेक्का तोड्नु पर्यो कि धरौती रकम लगेर काम गर्नु पर्यो भन्ने मुख्य माग हाम्रो यो छ । जनताले दुख पाउनु भएन’ – उनले भने ।
सडक डिभिजन कार्यालय दाङले जुन जुन ठाउँमा ठेक्का दिएर सडक अलपत्र परेका छन् । त्यस स्थानमा अविलम्ब निर्माण कार्य सुचारु हुनु पर्ने माग रहेको भुसालले बताए । साथै सडक डिभिजनले फोरलेन सडकको कार्यालय अन्तै हो भनेर पन्छिन नपाउने उनको जिकिर छ । दाङका जति भत्किएका सडक र निर्माण अलपत्र पारिएका सडक छन् त्यो सबैको कार्य क्षेत्र हेर्ने सडक डिभिजन कार्यालय भएकोले यसबाट पन्छिन नहुने उनले बताए ।
सडक अलपत्र अवस्थामा हुँदा उड्ने धुलोले स्थानीय र यात्रुलाई दम, क्यान्सर लगायतका प्राणघातक रोगहरु लाग्न सक्ने बताउदै तत्काल निर्माण कार्य सुचारु गर्न दवाब स्वरुप कार्यालयको गेटमा एक घण्टा ताला लगाएको बताए । उक्त सडक निर्माणका लागि मंलगबार नै निर्माण सामाग्री झार्ने सहमतिमा ताला खोलिएको पनि उनले जानकारी दिए ।
