(एबिसि संचार )
काठमाडौं उपत्यकाका धेरैजसो शैक्षिक संस्था आज बन्द भएका छन् । नेकपा एमालेको भ्रातृ संगठन युवा संघ र दुर्गा प्रसाईं समूहले गर्न लागेको शक्ति प्रदर्शनको कारण यातायात सेवा प्रभावित हुने भएपछि स्कुल, कलेज बन्द गर्नु परेको सञ्चालकहरुले बताएका छन् ।
युवा संघले तीन कुनेमा र प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाऊ महाअभियान’ले बल्खु चोकमा आज दिउँसो प्रदर्शन गर्ने तयारी छ । सरकारले दिएका कतिपय सार्वजनिक बिदाका दिनसमेत चल्ने गरेका काठमाडौंका नाम चलेका केही निजी विद्यालयले समेत आज विद्यार्थीलाई स्कुल नआउन भन्दै सूचना जारी गरेका छन् ।एकअर्काबीच आरोप–प्रत्यारोप गरिरहेका दुई समूहबीच झडप हुनसक्ने आकलन गरी सरकारले काठमाडौं उपत्यकाभरि नै आज विशेष सुरक्षा व्यवस्था मिलाएको छ ।
