बाँके । सशस्त्र प्रहरी बल नेपाल ३० नम्बर गण बागेश्वरी, बाँकेद्वारा चौलिका चेकपोस्टमा चेकजाँच गर्ने क्रममा ठूलो परिमाणको नगद बरामद गरेको छ।
चौलिका चेकपोस्ट, सशस्त्र प्रहरी बल बाँकेले स्रोत नखुलेको नेपाली १६ लाख नगद बोकेका २ जना व्यक्ति इन्डियन गाडीसहित पक्राउ गरेको छ ।
सशस्त्र प्रहरीले भारतसँग जोडिएको सीमा क्षेत्रमा हुने अवैध कारोबार, हुण्डी, तस्करी र भन्सार छलेर ल्याएको नगदमा निगरानी बढाएको छ। चौलिका क्षेत्र नेपालगन्जसँगै जोडिएको संवेदनशील नाका हो।
बरामद नगदको स्रोत खुलाउन नसकेमा रकम जफत हुन्छ। हुण्डी कारोबार, कर छली वा अवैध कारोबारमा संलग्नता देखिएमा राजस्व अनुसन्धान विभाग वा नेपाल प्रहरीलाई बुझाएर मुद्दा अघि बढाइन्छ। नियन्त्रणमा लिएका दुवैजनामाथि थप अनुसन्धान भइरहेको सशस्त्र प्रहरी बल नेपाल ३० गण हेट्क्वाटर बागेश्वरी बाँकेले जानकारी दिएको छ ।
