(एबिसि संचार )
मेडिकल व्यवसायी तथा गणतन्त्र विरोधी दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाऊँ महाअभियान’ का समर्थकहरु धमाधम पक्राउ पर्न थालेका छन् ।
प्रसाईंको आह्वानमा शुक्रबार प्रदर्शनका लागि तीनकुने पुगेका समर्थकलाई प्रहरीले नियन्त्रणमा लिएको हो । हालसम्म २६ जना पक्राउ परेका छन् । उनीहरुलाई जिल्ला प्रहरी परिसर काठमाडौंको नयाँ भवन माइतीघरमा लगिएको छ ।यसअघि बिहीबारको आन्दोलनमा ढुंगामुडा गर्ने ७ जनालाई प्रहरीले आज बिहानै पक्राउ गरेको थियो । उनीहरुलाई भने मुद्दा चलाउने प्रहरीको तयारी छ । तर प्रदर्शनका लागि तीनकुनेमा पुगेकाहरुलाई भने प्रहरीले त्यहाँ प्रदर्शन नगर्नको लागि मात्रै नियन्त्रणमा लिएको हो ।यसअघि जिल्ला प्रशासन कार्यालय काठमाडौंले प्रसाईं समूहलाई तीनकुनेमा प्रदर्शन गर्न अनुमति नदिएको बताएको थियो । प्रशासनको बिना अनुमति प्रदर्शन गर्न पुगेपछि प्रहरीले धमाधम पक्राउ गर्न थालेको हो । प्रसाईं भने भक्तपुरस्थित निवासमै नजरबन्दमा परेका छन् ।
