सुर्खेत । अविरल वर्षाले सोमबार बिहानदेखि अवरुद्ध सडक मंगलबार दिउँसोदेखि एकतर्फी रुपले खुलेको प्रहरीले जनाएको छ । कालिकोटको चौखोलामा गएको पहिरोले कालिकोट–जुम्ला खण्ड अवरुद्ध भएको थियो ।
कर्णाली राजमार्ग खुलेपछि हिजोदेखि बाटोमा अलपत्र यात्रुवाहक र मालवाहक गाडी गन्तव्यतर्फ लागेका छन् । पानी पर्ने बित्तिकै पहिरोले कर्णाली राजमार्ग अवरुद्ध हुने गरेको छ ।
कालिकोटको खाडाचक्र–१० चौखोलानजिकै घरजत्रा ढुंगासहित पहिरो खसेपछि सडक पूर्णरुपमा अवरुद्ध भएकामा ३० घन्टापछि खुलेको जिल्ला प्रहरी कार्यालय कालिकोटका सूचना अधिकारी पोषण थापाले बताए । ‘हिजोदेखिको प्रयास बल्ल आज सफल भयो,’ उनले भने, ‘चौखोलामा घरजत्रा ढुंगा खसेकाले विस्फोट गर्नुपर्ने अवस्था रहेकाले सडक खुल्न ढिलाइ भएको हो ।
कालिकोटको चौखोला, टाकुल्ला लगायतका ठाउँको पहिरो पन्छाएपछि सडक सुचारु भएको सडक डिभिजन कार्यालय जुम्लाले जनाएको छ ।
