बाँके । नेपालगन्ज उपमहानगरपालिका–४ र ६ मा विशेषगरी रातको समयमा छाडा चौपायाबाट हुने दुर्घटनाको जोखिम बढेपछि, प्रहरी प्रशासनले चौपायाको घाँटीमा टाढैबाट देखिने टल्किने रिफ्लेक्टर स्टिकर लगाउन थालेको छ।
वडा प्रहरी कार्यालय नेपालगन्जका प्रमुख, प्रहरी निरीक्षक अरुण बमका अनुसार, यो अभियानको उद्देश्य सवारी साधन र पैदल यात्रीलाई सुरक्षित बनाउन र दुर्घटनाको जोखिम घटाउन हो। रातिको समयमा छाडा चौपायाको उपस्थितिले सवारी साधनको ठक्करबाट हुने दुर्घटनालाई ध्यानमा राख्दै यो उपाय अपनाइएको हो।
प्रहरी निरीक्षक बमले दिनुभएको जानकारी अनुसार, स्टिकर टाढैबाट टल्किने भएकाले रातिको समयमा सवारी चालकले सजिलै देख्न सक्छन्, जसले गर्दा दुर्घटना घटाउन मद्दत पुग्नेछ। तर, यो काम चुनौतीपूर्ण बनेको छ। उहाँले भन्नुभयो, “प्रहरीको युनिफर्म देखेर गाईबस्तुले झम्टिन खोज्ने भएकाले स्टिकर लगाउन सादा पोशाकका प्रहरी परिचालन गरिएको छ।”
नेपालगन्जको छाडा चौपाया व्यवस्थापनलाई स्थायी समाधान दिन धेरै योजना बनाइए पनि हालसम्म ठोस नतिजा आउन सकेको छैन।
