काभ्रे । यौनलालच देखाई ५० वर्षिय व्यक्तिलाई कोठामा बोलाई अन्य केटाहरु ल्याएर कुटपिट गरी फिरौती रकम पाँच लाख असुली गरेपछि हत्या गरेर लासलाई काभ्रे ल्याएर राख्ने सिन्धुपाल्चोक कि मुख्य योजनाकार २१ वर्षीया युवतीसहित ‘हनीट्र्याप’ टोलिलाई प्रहरीले पक्राउ गरी सार्वजनिक गरेको छ ।
मृतक काठमाडौँ, कीर्तिपुरका ५० वर्षीय विनोद खड्गीको शव असोज ६ गते काभ्रेको पाँचखाल नगरपालिका–८ को ४९ किलो भन्ने ठाउँमा फेला परेको थियो । जिल्ला प्रहरी कार्यालय काभ्रेको प्रारम्भिक अनुसन्धानले विनोदको हत्या भक्तपुरमा भएको र पाँचखाल ल्याएर शव फालिएको पत्ता लगाएको छ ।
खड्गीको हत्याको मुख्य योजनाकार सिन्धुपाल्चोकको सुनकोशी गाउँपालिका–२ घर भई भक्तपुरको मध्यपुर ठिमी नगरपालिका–९ मा डेरा लिएर बस्ने २१ वर्षीया मनिषा महत हुन ।
खड्गीको अपहरण र हत्यामा संलग्नहरु काठमाडौँ शंखरापुर नगरपालिका – ५ बस्ने वर्ष २२ का सरिन घिमिरे , महोत्तरी जिल्लाको गौशाला नगरपालिका–६ घर भइ हाल भक्तपुरको कौशलटार बस्ने वर्ष २० का आशिष पासवान , शंखरापुर नगरपालिका–५ बस्ने वर्ष २१ का रिकेश पौडेल र बागलुङ जिल्लाको गलकोट नगरपालिका–७ घर भइ हाल काठमाडौँ, कोटेश्वरस्थित महादेवस्थान बस्ने वर्ष १९ का प्रतिक गौतम छन् । हत्यामा संलग्न ३ जना भारतीय नागरिक फरार रहेको छ ।
