पर्सा । वीरगञ्ज वडा नम्बर १६, भन्सार मेनगेटमा सशस्त्र प्रहरी नायब उपरीक्षक सुरज रिजालको नेतृत्वमा खटिएको टोलीले चेकजाँच गर्ने क्रममा भारतबाट नेपालतर्फ जाँदै गरेको बीआर ०५ एएम २६६४ नम्बरको स्कुटरलाई शंका लागी चेकजाँच गर्दा ठूलो मात्रामा अवैध रकम फेला परेको हो।
प्रहरीले स्कुटरमा सवार भारतको पूर्वी चम्पारण, रक्सौल नगर पन्चायत नागा रोडका ५८ वर्षीय अनिल कुमार रुङ्गटालाई नियन्त्रणमा लिएको छ। रुङ्गटाको झोलाबाट स्रोत नखुलेको नेपाली रूपैयाँ ३ लाख ५३ हजार र प्रतिबन्धित भारतीय रुपैयाँ ५०० दरका १७ हजार ५ सय फेला परेको सशस्त्र प्रहरी प्रवक्ता डिएसपी नरेन्द्र सिंह धामीले जानकारी दिएका छन्।
प्रहरीको अनुसार, अनिल कुमारले स्कुटरमा लुकाएर उक्त रकम ल्याउँदै गरेका थिए। नियन्त्रणमा लिइएका उनीसहित १ लाख ५० हजार मूल्यको स्कुटर र बरामद गरिएको रकम वीरगञ्ज भन्सार कार्यालयमा बुझाइएको छ।
सशस्त्र प्रहरीको टोलीले अवैध गतिविधिहरू नियन्त्रण गर्ने अभियानलाई जारी राख्दै, स्रोत नखुलेको रकमसहितको अवैध कारोबारको विरुद्ध कडा कारवाही गरिरहेको छ।
