पर्सा । बिरगंज सहकारी ठगीको आरोपमा ५२ दिनदेखि हिरासतमा रहेका रवि लामिछानेलाई प्रहरीले पर्साको वीरगञ्जमा ल्याइएको छ । वीरगञ्जको सानो पाइला बचत तथा ऋण सहकारी संस्थामा बचतकर्ताको रकम हिनामिना भएको प्रकरणमा बयान लिनका लागि उनलाई पर्सा ल्याइएको हो।
जिल्ला प्रहरी कार्यालय, पर्साका प्रमुख एसपी कुमोध ढुंगेलका अनुसार, लामिछानेमाथि आजबाट बयान सुरु हुनेछ। “सरकारी वकिलको कार्यालयमा बयान लिनुपर्ने भएकाले प्रक्रिया आजदेखि अघि बढ्दैछ,” उनले जानकारी दिए।
सहकारी प्रकरणमा पूर्वडीआईजी छविलाल जोशी पनि हाल पर्सामै छन्। अनुसन्धानमा सहकारीको रकम विभिन्न व्यक्तिका नाममा ऋण लिई गोर्खा मिडिया नेटवर्कमा लगाइएको तथ्य फेला परेको छ। सो नेटवर्कमा लामिछाने र जोशी सञ्चालक रहेको खुलेको छ।
मुख्य आरोपी जिबी राई अझै फरार छन्। वीरगञ्जको सानो पाइला सहकारीमा बचतकर्ताको रकम अनियमितता भएको विषयमा पहिल्यै अदालतमा मुद्दा दायर भए पनि थप अनुसन्धान आवश्यक देखिएको भन्दै प्रहरीले फाइल पुनः खोलेको हो।
यसअघि लामिछानेले सुर्यदर्शन सहकारी, स्वर्णलक्ष्मी सहकारी, र सहारा चितवन बहुउद्देश्यीय सहकारीको ठगी प्रकरणमा बयान दिएका थिए। उनलाई प्रहरीले गत कात्तिक २ गते बनस्थलीस्थित पार्टी कार्यालयबाट पक्राउ गरी पोखरा लगेको थियो।
प्रहरीले लामिछानेमाथि सम्पत्ति शुद्धीकरण ऐनविपरीतको कसुरमा पनि अनुसन्धान गरिरहेको छ। यसअन्तर्गत, उनलाई ९० दिनसम्म हिरासतमा राखेर अनुसन्धान गर्न पाउने स्थिति रहेको छ। पर्सामा बयान सकिएपछि अनुसन्धान प्रतिवेदन सरकारी वकिलको कार्यालयमा बुझाउने तयारी भइरहेको प्रहरी अधिकारीहरूले बताएका छन्।
