काठमाडौं । मङ्गलबार बिहान मधेश प्र ०४ ००१ ख ०१५७ नम्बरको बसमा एक भारतीय नागरिकको शव फेला परेको प्रहरीले जनाएको छ ।
इलाका प्रहरी कार्यालय ढल्केबर धनुषाका प्रहरी निरीक्षक जटाशङ्कर यादवले मृतक भारतको मधुवनी जिल्ला सिम्री टोल निवासी अन्दाजी ७० वर्षीय जगदीश यादव रहेको बताउनुभयो ।
उहाँका अनुसार बस लालगढमा यात्रीहरु शौचालयका लागि आर्लिएको समयमा यादवलाई मृत अवस्था भेटिएका थियो । उहाँ सोमबार साँझ काठमाडौंबाट जटहीका लागि बसमा चढ्नु भएको थियो ।
तत्काल मृत्युका कारण हालसम्म खुल्न नसकेको बताउँदै प्रहरी निरीक्षक यादवले शव परीक्षणपछि मात्रै मृत्युको वास्तविक कारण थाहा हुने जानकारी दिनुभयो ।
बसलाई हाल इलाका प्रहरी कार्यालय ढल्केबरले नियन्त्रणमा लिएको छ । यस विषयमा थप अनुसन्धान जारी रहेको उहाँले बताउनुभयो ।
