काठमाडौं । जिल्लास्थित किस्पाङको लेक, ककनी, दुप्चेश्वर, शिवपुरी लगायतका स्थानमा हिमपात भएपछि हिउँ खेल्न र अवलोकन गर्न आउनेहरूको भिड लागेको छ। काठमाडौं नजिक भएकाले राजधानीबाट समेत पर्यटकहरू हिमपात अवलोकनका लागि नुवाकोट पुगेका छन्।
पश्चिमी वायुको प्रभावका कारण जाडोयाम सकिन लाग्दा परेको पानीपछि नुवाकोटका विभिन्न स्थान हिउँले ढाकिएका छन्। विशेष गरी किस्पाङ गाउँपालिकाको फिकुरी लेक, ककनी, शिवपुरी, सिक्रे, माथिल्लो भाल्चे, काहुले, घ्याङफेदी, उर्लेनी लगायतका क्षेत्रमा बाक्लो हिमपात भएको छ।
हिमपातका कारण उच्च भेगमा तापक्रम घटेपछि चिसो अत्यधिक बढेको छ। सर्वसाधारण चोकचोकमा भेला भएर दाउरा बालेर न्यानो तापिरहेका छन् भने हिउँदे बाली अन्न तथा तरकारी खेती गरेका किसानहरू भने खुसी देखिएका छन्। चिसोको प्रभावलाई मध्यनजर गर्दै स्थानीयलाई न्यानो रहन र तातो खानेकुरा सेवन गर्न सुझाव दिइएको छ।
