रुपन्देही । भैरहवाको सडकमा बेलाबेला झुल्किने घामको उज्यालोसँगै सडकमा खटिने रन्जु के.सी.को टीम कहिले विद्यालय त कहिले सडकमा देखिन्छ । १७ डिग्रीको मात्रै तापक्रम भएको मौसमी प्रतिकुलताको पर्वाह नगरी टाउकोमा सेतो ह्याट, निलो रंगको सेतो लाईनीङ भएको पोशाकको काँधमा क्रस खुकुरीको बिल्लासहित उनी दौडिरहेकी देखिन्छिन् । कठ्यांग्रिदो जाडोको पर्वाह नगरी उनी बिहानैदेखि साँझसम्म सडक र विद्यालयमा ट्राफिक शिक्षा बाँडिरहेकी छन् ।
यसै हप्ता मात्रै उनले भैरहवास्थित काशी नोबल एकेडेमी र भैरहवा नमूना माध्यमिक विद्यालयका विद्यार्थीहरुलाई २/२ घण्टा सडक दुर्घटना न्यूनीकरण र ट्राफिक नियमको बारेमा प्रशिक्षण दिइन् । काशीमा कक्षा ११ का ३० जना भन्दा बढी विद्यार्थीहरु सहभागी थिए । त्यस्तै भैरहवा नमूना माविमा विज्ञान, मानविकी, वाणिज्य र शिक्षा संकायका ९४ जना विद्यार्थीहरु सहभागी भएका थिए ।
समय मिलाएर विद्यालयमा विभिन्न संघ–संस्थाको समन्वयमा हुने ट्राफिक सचेतनासम्बन्धी गोष्ठीमा आफू जाने गरेको उनले बताइन् । उनले भनिन, ‘ट्राफिक सचेतना, सवारी दुर्घटना न्यूनीकरण बारेमा विद्यार्थीहरुलाई सम्झाउन सके, बुझाउन सके त्यसको असर सडकमा देखिन्छ । यसैले सडकसँगै विद्यालयहरुमा पनि कक्षा लिन थालेको हो ।’
