पर्सा । बिरगंज नेपाल कृषिप्रधान मुलुक भए पनि धान र चामलको आयात बढ्दै गएको छ। चालु आर्थिक वर्षको सात महिनामा वीरगञ्ज नाका हुँदै ८ अर्ब ६८ करोड रुपैयाँ बराबरको २२ करोड ६४ लाख ८ हजार २९ किलोग्राम धान आयात भएको छ। यो अघिल्लो आर्थिक वर्षको सोही अवधिको तुलनामा ७२ प्रतिशतले वृद्धि हो।
गत आर्थिक वर्षको सोही अवधिमा यो नाका हुँदै ४ अर्ब ९१ करोड रुपैयाँ बराबरको १३ करोड १८ लाख ५९ हजार ४१६ किलोग्राम धान आयात भएको थियो। वीरगञ्ज भन्सार कार्यालयका सूचना अधिकारी अमित तिवारीका अनुसार चालु आवमा धानसँगै चामलको आयात पनि उल्लेख्य रूपमा बढेको छ।
चालु आवको सात महिनामा १ अर्ब ३५ करोड रुपैयाँ बराबरको १ करोड ३३ लाख ७४ हजार ८२६ किलोग्राम चामल आयात भएको छ। अघिल्लो वर्षको सोही अवधिमा १ अर्ब ६ करोड रुपैयाँ बराबरको ८१ लाख १७ हजार १३० किलोग्राम चामल आयात भएको थियो।
त्यस्तै, मकैको आयातमा भने सामान्य गिरावट देखिएको छ। चालु आवको सात महिनामा वीरगञ्ज नाका हुँदै २ अर्ब ९६ करोड रुपैयाँ बराबरको ५ करोड ७७ लाख १४ हजार ५८३ किलोग्राम मकै आयात भएको छ, जुन अघिल्लो वर्षको सोही अवधिको तुलनामा थोरै कम हो। गत आर्थिक वर्षको सोही अवधिमा २ अर्ब ९७ करोड रुपैयाँ बराबरको ६ करोड ६० लाख ४९ हजार ९७२ किलोग्राम मकै आयात भएको थियो।
नेपाल कृषि प्रधान देश भए पनि बर्सेनि खाद्यान्न आयातमा निर्भर रहनु पर्ने स्थिति रहेको छ। आयातको यो दर निरन्तर बढ्दै जाँदा देशको व्यापार घाटा पनि बढ्दै गएको छ।
