दाङ । देउखुरीको लालमटियास्थित गोरखा आइडियल स्कूलमा अध्ययनरत विद्यार्थीहरूले आफ्ना अनेकौं प्रस्तुतिका माध्यमबाट अत्यन्तै जनचेतनामूलक सन्देश प्रवाह गरेका छन् । लुम्बिनी प्रदेशको राजधानी रहेको राप्ती गाउँपालिका – २, मा पर्ने स्कूलमा यस्तो कार्यक्रम गरिएको हो ।
विद्यालयले शनिबार आयोजना गरेको पूर्व प्राथमिक तथा प्राथमिक तह अन्तरगत यु केजीका बालबालिकाहरूको प्रस्तुति तथा अभिभावक शिक्षा कार्यक्रम माध्यमबाट उनीहरूले अस्वस्थकर खानेकुरा खानाले मानव स्वास्थ्यमा हुने हानीका बारेमा शिक्षामूलक नाटक प्रस्तुत गरेका थिए । विद्यार्थीहरुले ट्राफिक नियम पालनाको महत्व गीत र अभिनयका माध्यमबाट सन्देश प्रवाह गरेका थिए ।
विद्यार्थीहरूले उक्त समारोहमा कृत्रिम तरिकाले तयार गरिएका खानेकुराले स्वास्थ्यमा पार्ने नकारात्मक प्रभावहरुका बारेमा आफ्ना कलाबाट सचेत पार्दै घरमा तयार गरिने पौष्टिक खानाको महत्व समेत स्पष्ट पारेका थिए । सोही क्रममा ट्राफिक सचेतना सम्बन्धी गीतमा सडक दुर्घटना न्यूनीकरणका लागि ट्राफिक नियमको पालना आवश्यक रहेको सन्देश दिइएको थियो।
गोर्खा स्कूलको समारोहमा सहभागी हुन आएका अभिभावक, शिक्षक तथा स्थानीयबासीहरूले विद्यार्थीहरूको प्रस्तुतीको मुक्त कण्ठले प्रशंसा गरेका थिए । साथै यस्ता गतिविधिले बालबालिकामा सिर्जनशीलताकाे विकास हुने बढ्नुका र समाज सकारात्मक दिशातिर अघि बढ्दै जानसक्ने बताएका छन् । विद्यालय प्रशासनले विद्यार्थीहरूको सर्वाङ्गीण विकासका लागि यस्ता व्यावहारिक र सन्देशमूलक कार्यक्रमहरूलाई निरन्तरता दिने जनाएको छ।
विद्यालय सञ्चालक समितिका सदस्य लोकमान रिजालको अध्यक्षतामा भएको साे कार्यक्रममा लावान्य इन्टरनेशनल काठमाडौंकी निर्देशक पूजा शाहको प्रमुख आतिथ्यतामा कार्यक्रम गरिएको थियो । साथमा काठमाडौं विश्व विद्यालयबाट २२ जना शिक्षकहरूलाई ४८ घण्टाको आवधिक तालिमको शैक्षिक प्रमाणपत्र समेत वितरण गरिएको थियो । कार्यक्रममा नर्सरीदेखि कक्षा ४ सम्मका बालबालिकाहरूको विभिन्न सन्देशमूलक प्रस्तुतिहरु राखिएका थिए ।
विद्यालयका प्रिन्सिपल बसन्त बहादुर पुनको स्वागत मन्तव्यबाट सुरू भएको कार्यक्रमको सञ्चालन शिक्षिका पूजा गुरूङले गरेकी थिइन् । कार्यक्रममा अभिभावक र विद्यार्थी गरि हजारभन्दा धेरैको उपस्थिति रहेको थियो ।
