काठमाडौँ । त्रिभुवन अन्तर्राष्ट्रिय विमानस्थलस्थित भन्सार कार्यालयको वैदेशिक हुलाक शाखामा कार्यरत तीन जना कर्मचारी घुस लिएको आरोपमा पक्राउ परेका छन्।
अख्तियार दुरुपयोग अनुसन्धान आयोगको टोलीले आइतबार गोश्वारा हुलाक कार्यालय, डिल्लीबजारबाट उनीहरूलाई रंगेहात पक्राउ गरेको हो।
पक्राउ पर्नेहरूमा भन्सार अधिकृत इन्द्र न्यौपाने, कार्यालय सहयोगी गणेशप्रसाद पुडासैनी तथा हुलाक भन्सार पार्सल (निकासी) शाखामा कार्यरत नायब सुब्बा छविप्रसाद रिजाल रहेका छन्।
अख्तियारका अनुसार कार्यालय सहयोगी पुडासैनीको साथबाट घुसबापत लिएको १० हजार रुपैयाँसहित विभिन्न दरका विदेशी मुद्रा गरी जम्मा १ लाख ४६ हजार ४२० रुपैयाँ बरामद गरिएको छ। यस्तै, नासु रिजालको साथबाट घुस लिएको २० हजार रुपैयाँ तथा स्रोत नखुलेको रकमसमेत गरी कुल २ लाख ६८ हजार २८८ रुपैयाँ फेला परेको छ।
कुरियर कम्पनीमार्फत विदेश पठाइने सामानको भन्सार प्रक्रिया सहज गरिदिने बहानामा सेवाग्राहीसँग घुस माग्ने गरेको सूचना पाएपछि अख्तियारले छापा मारेको जनाएको छ।
छापाका क्रममा उनीहरूको नियन्त्रणबाट २३ थान मोबाइल फोनसमेत बरामद गरिएको अख्तियारले जानकारी दिएको छ।
घटनाबारे थप अनुसन्धान भइरहेको आयोगले जनाएको छ।
