उर्लाबारी । इलाका प्रहरी कार्यालय (इप्रका) उर्लाबारीको इतिहासमा पहिलोपटक महिला नेतृत्व आएको छ । सोमबारदेखि प्रहरी निरीक्षक (इन्सपेक्टर) नवीना वलीले उर्लाबारी प्रहरीको कमाण्ड सम्हाल्ने भएकी छन् ।
उपत्यका प्रहरी कार्यालय, उजुरी छानबिन तथा मानवअधिकार शाखा रानीपोखरी, काठमाडौंबाट सरुवा भई आएकी वलीलाई प्रहरी संगठनभित्र कुशल र परिणाममुखी अधिकृतका रूपमा चिनिन्छ । यसअघि कार्यरत इन्सपेक्टर रञ्जन बरालको सुनसरीको दुहबीस्थित विशेष सुरक्षा गणमा सरुवा भएको छ ।
प्रहरी मुख्यालयले शुक्रबार देशभर २४ जना इन्सपेक्टरको काज सरुवा गरेसँगै उर्लाबारीमा ऐतिहासिक परिवर्तन भएको हो । वि.सं. २०५० साल वैशाखमा इप्रका उर्लाबारीमा इन्सपेक्टर दरबन्दी थपिएपछि पहिलो इन्चार्जका रूपमा प्रनि रघुवीर शेर्पाले पद सम्हालेका थिए । त्यसयता हालसम्म ५६ जना प्रहरी निरीक्षक यहाँ पदस्थापन भए पनि महिला नेतृत्व भने पहिलोपटक आएको प्रहरी अभिलेखमा उल्लेख छ ।
स्थानीयवासीले महिला नेतृत्वले प्रहरी सेवामा संवेदनशीलता, पारदर्शिता र समुदायसँगको सम्बन्ध अझ मजबुत बनाउने अपेक्षा गरेका छन् । समाजका जटिल समस्या समाधानदेखि महिला, बालबालिका तथा मानवअधिकारसँग सम्बन्धित मुद्दामा नयाँ ऊर्जा आउने विश्वास व्यक्त गरिएको छ ।
उर्लाबारी प्रहरीको कमाण्ड सम्हाल्ने पहिलो महिला इन्चार्जका रूपमा वलीको आगमनलाई ऐतिहासिक उपलब्धि र सकारात्मक परिवर्तनको संकेतका रूपमा हेरिएको छ ।
