काठमाडौं । १. म सरकारकाे नेतृत्व गरिरहेकाे राष्ट्रिय स्वतन्त्र पार्टीकाे ‘सदस्य’ मात्र हुँ। पार्टीकाे सांगठनिक संरचनामा कतै पनि निर्णयाधिकारी हाेइन, सुझावकर्ता मात्र हुँ।
२. अधिकांश मन्त्रीसँग मेराे सामान्य चिनजान बाहेक तपाईंहरूले साेचेकाे जस्ताे ‘घनिष्ठ’ सम्पर्क र सम्बन्ध छैन। त्यसैले तपाईंहरूकाे विविध चासाे र चिन्ता म श्रवण मात्र गर्न सक्छु। सम्बाेधन गर्न नसक्ने व्यहाेरा श्रवणकाे मात्रै के अर्थ!
३. म सरकार, मन्त्री, सांसद र पार्टी नेताहरूबाट तपाईंले अपेक्षा गर्नु भएकाे ‘काम’ गर्ने/गराउने पहुँच र सामर्थ्य पटक्कै राख्दिन। ‘राख्छ कि’ भन्ने साेच्नेहरू प्रति आभारी छु।
४. चुनावी परिणाम आएपछि एकतर्फी रुपमा बढेका ‘मित्र’ र गाँसिएका ‘साइनाे’प्रति अत्यन्तै सम्मान छ। उहाँहरूलाई मैले फर्काउन सक्ने स-प्रेम सम्मान मात्र हाे।
५. ‘यसाे भेटाैं न’, ‘चिया/कफी पिउनु पर्ने’ भनेर सयाैं ज्ञात-अज्ञात ‘मित्र’बाट प्राप्त आग्रह हाल स्वीकार्न संभव नरहेकाेमा स्वयम् दु:खी छु। समयअनुकूल भएसम्म स्वीकार्ने छु।
६. म्यासेज र फाेन यति बढ्याे कि चाहेर पनि सबैकाे ‘रेस्पाेन्स’ गर्न सकेकाे छैन। तपाईंहरूकाे ‘जरुरी’ अनुमान गरेकाे छु, आवश्यक पर्दा आफैं सम्पर्क गर्ने छु।
७. सार्वजनिक रुपमा यसरी स्वघाेषणा गर्नु पर्दा काेही कसैकाे भावनामा ठेश पुग्न गएकाे भए क्षमाप्रार्थी छु। र, यसका बाबजुद पनि म प्रतिकाे तपाईंकाे व्यक्तिगत धारणा/बुझाई पूर्ववत सकारात्मक रहने विश्वास लिएकाे छु।
धन्यवाद!
