दाङ । देउखुरी – लमहीमा रहेको गोरखा मोडेल सेकेन्डरी स्कूलले आफ्नो शैक्षिक सत्र २०८२ का कतिपय महत्त्वपूर्ण उपलब्धिहरु सार्वजनिक गरेको छ । विद्यालयले सोमबार बिहान आफ्नै विद्यालयको सभाहलमा पत्रकार भेटघाट तथा अन्तरक्रिया कार्यक्रम मार्फत शैक्षिक तथा अतिरिक्त क्रियाकलाप तर्फका उपलब्धिहरु सार्वजनिक गरेको हो ।
विद्यालयका प्राचार्य लोकमान रिजालले विद्यालयले छोटो समयमै दाङको देउखुरी उपत्यकामा गुणस्तरीय शिक्षाको क्षेत्रमा महत्वपूर्ण भूमिका निभाउन सफल भएको जानकारी गराए । विद्यालयको उन्नति, प्रगति र विस्तारमा सञ्चारकर्मीहरुको साथ, सहयोग र सकारात्मक भूमिकाप्रति सह्रानीय भएको प्राचार्य रिजालले धारणा व्यक्त गरे ।
विद्यालयले कक्षा ८ मा लमही नगरस्तरमा छात्र र छात्रा दुवैतर्फ प्रथम स्थान हासिल गरेको छ, उनले पत्रकारहरुसित स्पष्ट पारे । त्यसैअनुरूप एस.इ.इ. परीक्षामा १ जना विद्यार्थीले ४ जीपीए र ३० जनाले ए प्लस प्राप्त गरेको बताएका छन् । कक्षा १२ विज्ञान र व्यवस्थापन गरी दुवै विषयमा देउखुरीमै प्रथम स्थान हासिल भएको छ, प्राचार्य रिजालले खुशी व्यक्त गरे ।
विद्यालयले व्यवस्थापनतर्फ १३ जना विद्यार्थीले ए प्लस स्थान प्राप्त गर्न सफल भएको बताएका छन् । आईओई र आईओएम प्रवेश परीक्षामा ९ जनाले पूर्ण छात्रवृत्ति र २८ जनाले स :शुल्क नाम निकाल्न सफल भएको विद्यालयले जनाएको छ ।
अतिरिक्त क्रियाकलापतर्फ पनि विद्यालयका विद्यार्थीहरुले उत्कृष्ट प्रदर्शन गरेका छन् । निबन्ध, कविता, चित्रकला तथा नृत्य प्रतियोगितामा नगर तथा जिल्ला स्तरमा प्रथम, द्वितीय र तृतीय स्थान हासिल गरेका छन् । खेलकुदतर्फ मिनी म्याराथन, रनिङ, लङ जम्प र ट्रिपल जम्प लगायतका प्रतियोगितामा पदक हातमा पार्न सफल भएको छ ।
त्यसैगरी सातौं राष्ट्रपति रनिङ शिल्डमा १९ स्वर्ण पदकसहित प्रथम स्थान हासिल गरेको विद्यालयले जानकारी दिएको छ ।
सोही विद्यालयमा हाल २ हजार, ३ सय, २८ जना विद्यार्थीहरु अध्ययनरत रहेका छन् । ७५ जना पूर्णकालीन तथा ९ जना आंशिक शिक्षक कार्यरत छन् भने ३४ जना कर्मचारी रहेका छन् ।
आगामी शैक्षिक सत्र २०८३ मा शिक्षण सिकाइलाई अझ प्रभावकारी र व्यवहारिक बनाउन विभिन्न कार्यक्रमहरुलाई निरन्तरता दिने विद्यालयले जनाएको छ ।
पूर्व–प्राथमिकदेखि माध्यमिक तहसम्म परियोजना कार्य, योग अभ्यास, लागुऔषध सचेतना, हस्तलेखन सुधार, नियमित स्वास्थ्य परीक्षण, मनोपरामर्श तथा शिक्षकहरुको व्यवसायिक विकास तालिम सञ्चालन गरिने बताइएको छ ।
विद्यालयले नयाँ शैक्षिक सत्रका लागि भर्ना अभियान पनि घोषणा गरेको छ । विद्यालयका अनुसार भर्ना फारम २०८३ बैशाख २ गतेदेखि खुल्नेछ । भर्ना प्रक्रिया बैशाख १५ गतेदेखि सुरु हुनेछ । कक्षा सञ्चालन बैशाख २१ गतेदेखि हुने जानकारी गराएको छ ।
